Seguro obligatorio di Covid pa bishitantenan ta wordo elimina

The content originally appeared on: Diario

Entrante dia 8 di juli 2022 — *ED Card si ta keda obligatorio 

ORANJESTAD (AAN): Na juli 2020, Aruba a habri su frontera bek pa bishitantenan di Estados Unidos y a inicia cu e Aruba Visitors Insurance. Esaki tabata un innovacion den medio di pandemia, cu a wordo sigui despues pa otro destinonan.

            E seguro aki tabata obligatorio pa tur bishitante y di e forma aki a sigura cu tur caso di turista cu a test positivo durante nan estadia por a conta entre otro riba cobertura di acomodacion pa isola, transporte, test di covid y gastonan di dokter, hospital y ICU. 

            Pa algun luna caba tabata den contacto cu companianan di seguro, indicando cu lo mantene e seguro aki mientras CDC tin e rekisito di test obligatorio prome cu drenta Merca.        Recientemente CDC a anuncia cu a elimina e requisito di test y na e momento ey A.T.A. a presenta un peticion den plataforma di Crisis Nacional pa elimina e seguro obligatorio di $15 pa cada turista.

            Entrante dia 8 di juli 2022 e seguro obligatorio ta keda elimina. Tur persona cu a cumpra nan seguro prome cu dia 8 di juli lo keda sigura te cu nan fecha di partida. Mester menciona cu e seguro aki ta “non-refundable” pa esnan cu a cumpre caba pa un yegada prome cu 8 di juli.

            Na inicio di e pandemia di Covid-19, seguronan di biahe tradicional no tabata cubri Covid-19. Entretando esaki a cambia y A.T.A. ta keda conseha tur bishitante pa bin Aruba cu seguro di biahe y pa esaki ta un seguro cu ta cubri Covid tambe.

            Importante pa menciona ta cu e online ED CARD si ta keda algo obligatorio prome cu haci un bishita pa Aruba.

            E eliminacion di e seguro obligatorio aki sigur ta otro indicacion di recuperacion pa nos industria y nos isla cu a ricibi 1.3 millon bishitante (stayover) entre juli 2020 y fin di mei 2022.