Segun Huez aumento di arma ta atentado contra turismo!

The content originally appeared on: Diario

Den sala di Corte Huez a adverti pa criminalidad den black market

*Expertonan ta mira necesidad pa asistencia internacional Aruba

*Informantenan ta mustra cu armamento a bira circulo vicioso 

ORANJESTAD(AAN)—Arma ta uno di e negoshinan di black market cu mas ta plama rond mundo y ta destrui bida y bienestar di henter comunidad.

Na diferente ocasion DIARIO a presenta relatonan di expertonan cu a expresa preocupacion serio pa e negoshi di arma na Aruba, cu ayera a bira base di un advertencia serio den corte di Husticia.

Durante e tratamento di e caso di un repartidor di corant, cu a wordo alcansa pa un bala, Huez a adverti pa presencia y uzo di arma na Aruba y e peliger cu e crecemento di criminalidad ta nifica pa Pueblo tanto riba tereno di seguridad personal como riba tereno economico.

Den e Caso di Corte e Guera di Gangnan a bini dilanti ayera con un repartidor inocente di corant, a bira victima di pelea di gang cu a dispara riba su auto pasobra nan a kere cu e ta otro persona.

Con peligroso e realidad di presencia di arma den man robez ta, a bini dilanti ora e acusado a splica cu e no ta bon conoci cu e forma cu mester atende cu un arma.

Huez no a laga duda di e peliger cu arma ta pa hende y pa economia di Aruba cu ta basa riba turismo, cu no ta soporta e menasa di uzo di arma den un comunidad.

E hecho cu crimen basa riba uzo di arma clandestino ta crece, ta encera un peliger grandi pa turismo segun Huez.

E remarke di Huez ta completamente di acuerdo cu informacionnan economico mundial, cu ta indica con halto seguridad personal ta riba e lista di turistanan den un mundo di problema grandi y di criminalidad cu ta aumenta.

DIARIO a discuti ayera e advertencia di Huez cu informantenan cu a mustra riba e problemanan serio cu accion dirigi contra presencia ilegal di arma, ta confronta.

A discuti diferente forma cu por atende cu e problema, cu manera un informante clave a trece dilanti, a bira un circulo vicioso.

Condicionnan social a crea tera fertil pa criminalidad den cual e black market a florece, sigur pa trafico ilegal di productonan y articulonan mara na criminalidad.

Riba tereno internacional por mira con bandanan ta haci uzo di refugiadonan pa trafica den por ehempel arma y droga.

Prostitucion y negoshinan ilegal ta keda centronan di actividad di bandanan criminal, cu ta presente tambe den e trafico di arma cu a mara su mes na tur forma di criminalidad.

Resultado di aumento di arma den man criminal a haci cu miedo ta inspira mas y mas hende pa arma nan mes na forma secreto.

Ya cu ta trata di un acto contra ley, un persona cu por ehempel perde su arma of descubri cu su arma a wordo horta, no ta bati alarma pasobra e ta na haltura cu e hecho cu e tin arma den su poder, ta castigabel.

Pues e aumento di crimen den cual ta uza arma, ta haci cu mas hende ta cumpra arma, expone nan mes na e peliger di negoshi den arma pero cu miedo pa expone nan mes na autoridad, cu por castiga hende pero no ta peligroso manera bandanan criminal.

Informantenan clave a indica cu Aruba mester pidi asistencia di Reino y instancianan internacional manera Interpol pa atende cu e negoshi di arma, cu ta mara na tur forma di criminalidad y ta mucho mas peligroso y dificil pa atende cune.

Na nivel internacional, autoridad continuamente mester introduci metodonan nobo pa atende cu e crecemento di negoshi den arma cu ta ademas basa riba negoshi internacional.

Mas informacion di fuentenan cu kende a discuti e asunto aki, ta mustra cu por haci uzo di pensionadonan di Cuerpo Policial, cu ta conoci cu mundo di criminalidad na Aruba y cu por sostene asistencia internacional.

E alarma cu Huez a bati ayera den Corte enfrente e peliger di negoshi di arma na Aruba, sigur mester haya tur atencion riba termino hopi cortico ya cu e situacion mundial caotico, ta produci mas y mas motibo pa criminalidad manera hamber, migracion cu ta costa placa y di cual criminalnan ta trata di abusa.

Turismo no ta soporta criminalidad ya cu e turista ta gasta su placa pa su trankilidad, paz y su bienestar.

Agentenan di biahe ta proteha nan clientenan tambe y ta evita bende destinacionnan cu criminalidad ta haci peligroso pa nan cliente.

Na momento cu criminalidad mishi cu turismo, economia ta den problema serio manera anteriormente DIARIO a trece dilanti a base di informacion concreto y manera ayera a keda confirma pa Huez den Corte di Husticia.