Scol SPO na Santa Cruz ta cla pa cultiva nan prome cosecha di lechuga

The content originally appeared on: Diario

Cu e sistema hydroponico

ORANJESTAD (AAN): Esaki si ta un preciosidad cu ta na encargo di Scol pa Ofishi Santa Cruz.  Nan ta trahando cuidadosamente, pero ta bayendo den bon direccion cu nan systema hydroponico cu a ser crea na nan scol.

   Manera por mira, nan sistema hydroponico ta den full operacion y a ser mustra e siman aki, cu nan por spera cosecha di Lechuga den algun siman.

   DIARIO a nota cu hopi scol na Aruba ta yuda crea hardin y ta cultivando mata, incluyendo Scolnan Basico.  Awor, ohala tur Scol Secundario na Aruba, por tin esaki como parti di nan proyecto escolar.

   Docentenan y alumnonan ta hopi entusiasma cu e produccion aki, y sigur ta un bon incentivo pa envolvi futuro ciudadanonan di e isla aki den e sector primario pa asina nan compronde e importancia di produccion di berdura.

   Hecho ta cu hobennan tin di wordo encurasha pa come saludabel, y tin di wordo educa riba e forma cu cuminda ta wordo traha y produci.  Un di e formanan mas proactivo pa educa y motiva nan pa come na un forma corecto, ta pa siña nan con pa cultiva nan mesun cuminda.

   Si bo duna nan e guia, y pa nan haya amor pa cultiva fruta y berdura, e lo duna nan e hermentnan adecua pa nan por tuma decisionnan corecto di nutricion pa resto di nan bida, y lo bay duna nan un interes pa semper den medio ambiente.

   Hecho ta cu a keda comproba, cu mucha- y hobennan cu siña con pa cultiva nan mesun berdura, tin mas chens di come hopi berdura pa resto di nan bida.  Hobennan cu haya sa mas encuanto lechuga, boonchi, jambo, pinda, wortel, y eggplant, lo bay compronde tambe pakico nan ta mucho mihor envez di come mangel of fast food.

   DIARIO ta felicita Scol SPO Santa Cruz y demas scolnan local cu ta dirigi nan mes awor hopi pa cultiva nan mesun fruta y berdura den nan hardin.