Scol Basico Kudawecha a haya su hardin di alimentacion

The content originally appeared on: Diario

Minister Ursell Arends:

ORANJESTAD (AAN):  Den un iniciativa pa inculca balornan di practicanan di agricultura sostenibel y importancia di siguridad di alimentacion den e siguiente generacion, Minister Arends a lansa un proyecto di agroforesteria na scolnan basico na Aruba.

            Diasabra 17 di Februari 2024, boluntarionan, maestronan, y studiantenan a uni forsa pa prepara un hardin di alimentacion na Scol Basico Kudawecha, marcando e di dos instalacion exitoso dentro di e proyecto aki. E entusiasmo y esfuerso colectivo di comunidad a haci e evento uno memorabel, demostrando e potencial pa educacion ambiental colaborativo.

            E proyecto lo continua te cu juli unda lo evalua e siguiente etapa pa engrandece proyecto hunto cu Living Soil y Santa Rosa. E hardinnan aki no ta solamente un herment educativo, pero tambe ta sirbi como un empuhe pa muchanan haya e entusiasmo pa sigui planta na cas cu un mentalidad di provee pa nan mes.

            “Mi ta increiblemente orguyoso di e pasion y dedicacion cu mi ta mira den nos comunidad escolar y boluntarionan,” segun Minister Ursell Arends, kende ta encarga cu Sector Primario. “E proyecto di agroforesteria na scolnan basico ta un paso importante den e direccion di un Aruba mas saludabel y consciente. Hunto, nos ta sembrando e simianan pa un futuro mas sostenibel.”

            E exito di e proyecto te awor a ser logra den colaboracion cu Santa Rosa y Living Soil, hunto cu boluntarionan. Minister Arends ta extende un palabra di gradicimento na tur esnan cu a contribui na e proyecto den cualkier forma.

            Ministerio di Naturalesa ta invita e comunidad pa uni bou di e proyecto di agroforesteria na scolnan basico cu esfuerso continuo pa uza nos recursonan natural na un manera responsabel y educa nos muchanan riba e importancia di siguridad di alimentacion.