Scarcedad di vivienda barata a pone den evidencia problematica cu uso ilegal di trailer y containernan pa biba

The content originally appeared on: Diario

For di ‘padestoel houses’ te na ‘tiny-houses’

ORANJESTAD (AAN):   Diamars mainta a tuma nota di un publicacion cu Departamento di Obranan Publico (DOW) y Directie Infrastructuur a haci riba medionan social unda ta referi na e asina yama ‘tiny/minihouses’.

            E informacion ta indica cu a tuma nota di companianan cu ta haciendo propaganda pa traha y benta di viviendanan tipo ‘tiny/minihouses’ container, trailer of otro tipo di material cu NO ta bloki pa wordo uza como vivienda.

            DOW y DIP a remarca cu tur e viviendanan aki no por wordo uza sin cu tin:

– un permiso di tereno (DIP)

– permiso di construccion (DOW)

– pa transportacion di e viviendanan aki mester di un permiso di KPA si acaso e ta mas grandi cu e midinan stipula den ley di trafico.

            Si e tereno ta ‘eigendom’ tambe mester e permisonan menciona, pa motibo cu e tereno mester cumpli cu e ‘exigencianan di e ‘bouwverordening’ y tambe mester cumpli cu e destinacion di e tereno.

            E informacion aki a hala atencion di hopi hende mirando cu for di basta tempo caba a mira cu huurmento di tereno pa pone container of trailernan pa vivienda a crea un situacion basta fastioso pa loke ta seguridad di vivienda na Aruba.

            Djis mester core rond na Aruba y drenta den diferente bario y constata e cantidad di trailer y containernan cu ta wordo uza como vivienda. Nan a broei manera ‘padestoel’ tur caminda. Algo cu tampoco tabata existi antes na Aruba.

            Awor e pregunta ta si e sorto di viviendanan aki tin permiso? Si nan ta apto pa biba aden? Si nan ta cumpli cu e permisonan rekeri? Si DIP y DOW a pasa controla nan?

            Entre otro, esaki ta algun di e preguntanan cu ta surgi pasobra den pasado DIARIO a haya informacion for di DOW mes cu e sorto di viviendanan aki, mayoria ta ilegal y cu tabata tin casonan andando den corte cu e doñonan di e terenonan. 

NECESIDAD DI VIVIENDA NA ARUBA 

            En corto, e necesidad di vivienda na Aruba sigur ta uno grandi, pero den e ultimo añanan, e yegada di hopi imigrante, cu tabata huy for di un situacion explosivo na nan paisnan, a pone den evidencia e problematica cu esaki tambe a crea.

            Por constata cu mayoria di e personanan cu ta habita e containernan of trailernan (bieu) ta esnan cu ta den un situacion vulnerabel na Aruba na e momentonan aki.

            Akinan, ban bisa, cu e problema ta radica. Ya cu e personanan aki tin mester di un lugar pa biba y tin doñonan di tereno cu a mira esaki como un oportunidad pa nan haci negoshi net cu e poblacion vulnerabel.

            Awor, ken ta fayando?  E doño di e container bieu sin permiso cu ta wordo gehuur? Of e persona den condicion vulnerabel, cu mester di un lugar pa biba na un prijs di huur abao?

 COMERCIO DI ‘TINY HOUSES’

            Mester subraya si cu mas recientemente na Aruba a lanta varios compania cu ta dedica na e benta di ‘tiny houses’ cu ta masha bunita mes y cu ta resolve hopi di e necesidadnan aki di vivienda, principalmente pa esnan cu ta pensionado caba, esnan cu tiki presupuesto pa traha un cas mas grandi, esnan cu limitacionnan pa haya un prestamo na banco, etc.

            Den e caso aki, e companianan aki si ta ‘suppose’ di  mester ta cumpliendo cu e puntonan cu DOW y DIP a señala anteriormente. Pero di algo cu por a tuma nota ta cu e companianan aki tambe ta bogando pa haci e proceso di permisonan, etc uno mas lihe.

            A ofrece un solucion di vivienda pa un grupo di e poblacion locual ta totalmente valido mas cu claro, si tur cos ta bay segun rekisitonan.

            Pero awor lo ta interesante pa sa cua ta e situacion real den e mundo aki di ‘tiny houses’ y con DOW y DIP a atende cu e asunto aki di vivienda ‘padestoel’ cu a surgi na Aruba varios aña pasa.   

            DIARIO lo keda pendiente di e desaroyo aki.