Santa Rosa y Departamento di Asunto Economico ta trahando hunto riba e proyecto “Agripreneur”

The content originally appeared on: Diario

Zulema Erasmus ta relata:

ORANJESTAD (AAN) – Zulema Erasmus, representando Departamento di Economia, Comercio y Industria, a forma parti di e lanzamento di e campaña “Food Security”, cu a tuma lugar na Santa Rosa, como cu e Departamento di Asuntonan Economico ta partner.

Erasmus a relata cu Departamento di Asuntonan Economico hunto cu Santa Rosa ta cooperando hopi di cerca, ya pa hopi aña; nos ta trahando hunto riba e proyecto “agripreneur”.

Esaki ta e implementacion di e plan di accion di e rapport di “Road Bank”. Erasmus a informa cu pa esnan cu ta interesa, nan tin e rapport aki riba e website di Departamento di Asuntonan Economico. E idea pa e rapport aki, a cuminza recien Aruba tabata den e pandemia, ora cu hopi di nos ciudadanonan tabata sinti den inseguridad si lo bay tin suficiente cuminda den e supermercadonan, si lo bay tin suficiente producto pa come; y mirando cu  Departamento di Asuntonan Economico ya caba tabata den un proyecto hunto cu Union Europeo, pa ubica fondonan pa temanan manera “resiliency”  (sali y recupera for di un crisis) of cambio climatico. E ora ey a dicidi hunto cu gobierno di Aruba y Santa Rosa pa coloca fondonan pa un rapport riba seguridad di cuminda, cu ta taha door di “Road Bank”.

Erasmus a agrega cu e proyecto aki a wordo lidera door di un persona local, cu ta señor Randall De Kort, cu ta un experto cu a yuda expertonan di Road Bank. “Eigenlijk, loke a haci ta evalua e situacion na Aruba y trece recomendacionnan con pa reforza e sector di agricultura; pues, pa reforza e seguridad di cuminda, y asina bin recomendacionnan pa stimula mas compania y mas comercio den e sector di agricultura, pero tambe a bin cu recomendacionnan pa e grupo cu a crece, durante e pandemia cu ta e personanan cu ta planta den nan cura di cas”, señora Zulema Erasmus a menciona.

Erasmus a añadi cu for di e recomendacionnan aki, a traha un plan di accion pasobra nan no tabata kier pa e rapport menciona bay den lashi. Anto, asina Departamento di Asunto Economico hunto cu Santa Rosa, ta trahando hopi di cerca pa por implementa e accionnan aki, y e presencia di su departamento den e lanzamento di e campaña, ta un di e recomendacionnan di rapport di “Road Bank”.

Prome cu e proyecto aki, specialmente e unit di IDEA tabata tin diferente proyecto hunto cu Santa Rosa, riba temanan specifico pa Agripreneur.

“Anto, asina den interaccion cu e Agripreneur, tambe tabata mira ki retonan tin y tabata adapta e tayernan di trabao pa e agripreneurnan. Esaki ta andando desde 2017”, señora Zulema Erasmus a subraya.

El a agrega cu nan ta contento di wak cu otro departamentonan tambe ta mira e importancia di e sector di agricultura. Por ehemplo, Douane ta duna excepcion riba impuesto di importacion pa productonan cu ta destina pa wordo utiliza pa e negoshi di agricultura, cria, pesca of cuido di abeha. Departamento di impuesto tambe ta duna incentivo cu e meta di stimula e aumento di produccion den e sector primario. Por haya mas informacion na e Departamento di IDEA.