Rotary Club cu Caminata “End Polio Now”

admin

Dia 19 di November proximo:

ORANJESTAD (AAN) – Rotary Club Aruba a tene un conferencia di prensa Diamars mainta, tocante e Dia Mundial di Poliomielitis, den cual sr. Frederick Nuboer, Secretario, a hiba palabra.

Dia 24 di October a wordo declara como Dia di Poliomelitis door di Rotary Club Internacional, pa recorda e fecha natal di Jonas Salk cu a descubri e vacuna di Polio.

Nuboer a señala cu Poliomielitis ta un malesa altamente contagioso, y mas tanto ta ataca muchanan den edad di cinco aña y mas chikito ainda.

E malesa aki ta wordo contagia di awa pa awa, y ora un persona ta nister por pase riba otro. E ta un malesa cu ta ataca e sistema nervioso di un persona y tin biaha ta lague paraliza.

E malesa aki ta incurable, pero tin un vacuna pa preveni. Rotary Club a haci su esfuerzo pa varios aña caba, for di 1998 pa vacuna mas tanto mucha na mundo. Un total di 2.5 miyon di mucha na mundo a haya e vacuna contra Polio durante e campaña di Rotary.

Hunto cu e Organizacion Mundial di Salud, Rotary Club y Unicef, a cuminza cu un iniciativa global pa eradica polio na aña 1998. Na 2007 un fundacion a uni na e lucha aki cu e compromiso di eradica polio.  Na 2013 e fundacion concerni a pone 2 florin riba cada florin recauda pa Rotary pa asina contribui cu 35 miyon pa aña pa eradicacion di Polio y na e momentonan aki un total di 1.6 miyon dollar a wordo recauda y asina a logra para 99.9 di e casonan cu por a wordo infecta cu polio rond mundo.

No obstante esaki no por stop cu e campaña. Esaki mester sigui, Nuboer a subraya. El a menciona cu tin tres pais na mundo cu ta afecta pa Polio. Nan ta Afghanistan, Pakistan y Nigeria. Si keda sin haci nada aki diez aña dos mil hende lo ta afecta atrobe pa e malesa aki. Na tur pais di mundo, durante tres aña largo, mester sigui duna e vacuna na tur e muchanan pa ta sigur cu e ta wordo eradica na henter mundo.

Seguidamente sr. Orlando Hoevertsz a hiba palabra y a referi na un caminata cu ta bay tin dia 19 di November proximo. Hoevertsz ta Presidente di e Comision “End Polio Now”. Pa concientiza nos comunidad Rotary Club, Rotaract Club of Aruba, Xavier University, entre otro, ta organizando e caminata menciona. E ta cuminza na Fisherman Hut y lo bira bin bek na Arashi. Mitad caminda lo tin un post di awa. Prome cu e cuminza lo tin actividad musical y un semi les di Sumba. Registracion ta 4.30 or di atardi y e caminata ta cuminza pa 5’or di atardi. Inscripcion ta na IBISA for di awor caba. Cada persona ta haya un bunita flanel. Na final di e evento lo tin bunita premio den forma di rifa y doorprizes.

 

Next Post

Charla di Museo Arqueologico di investigacion tocante un naufrago na Puente/Andicuri

Awe Diarason na MFA Paradera ORANJESTAD  (AAN):  En conexion cu periodo di horcan, Museo Arqueologico Nacional Aruba (MANA) hunto cu MFA Paradera, ta ofrece publico un charla sumamente interesante di un investigacion riba un naufrago di kende su restonan di skelet  a ser haya na Puente/ Andicuri algun aña pasa. E charla […]