Rocco G. Tjon, di MEP papiando riba Politica profesional

admin

Nos mester mehora e calidad di bida riba nos isla. Esaki lo sosode no solamente door di haci barionan mas bunita y drecha infrastructura, pero tambe y esencialmente door di stimula e ciudadano pa e mes aspira mehoransa riba tereno social, mental y moral.

A traves di politica profesional por fomenta un mentalidad sano y baha e tono agresivo cu ta reina den nos pueblo. Respet ta algo crucial den esaki. Respet pa opinion di otro, respet pa constitucion y reglanan vigente, respet pa inteligencia di otro, respet pa nos institucionnan manera; iglesia, sindicato, husticia, Algemene Rekenkamer, Banco Central, Sociaal Economische Raad, y Raad van Advies.

Como politico nos mester ta consciente cu nos tin un “voorbeeld functie” y p’esey nos mester hiba politica riba nivel y expresa critica riba e echo y no e persona; critica fuerte den un tono respetuoso y no haci insinuacion dubioso.

Politiconan ta wordo considera lidernan y liderazgo cu nan ta demostra ta afecta nos comunidad den su totalidad. Liderazgo etico ta wordo defini a traves di e meta, e comportacion y e consecuencianan (Yukl, 2013). Un politica honesto y transparente no ta solamente importante pa restaura confiansa den politica, pero tambe pa aporta na mehora e decadencia social.

A wordo scientificamente prueba cu liderazgo etico ta influencia e norma y valornan di e siguidornan di e lider y e ta contribui na mehora e comportacion y actitud di e sostenedornan di e lider (DeConinck, 2015). Y ta p’esey e ta asina importante pa nos, como politico y lidernan, para pa un politica riba nivel. Un politica riba nivel lo haci politica mucho mas atractivo tambe pa nos hobennan profesional tuma e decision pa forma parti di e plataforma aki y contribui na un mihor Aruba.

Un politica riba nivel lo fomenta mas harmonia, enfatisa dunamento di respet y cooperacion pa asina nos por mehora e calidad di bida pa nos ciudadanonan, no a traves di inversion den infrastructura, pero mas bien door di fomenta mas harmonia y respet di ciudadano pa ciudadano.

Por ultimo, un parti esencial di e politica cu lo wordo hiba door di mi persona, ta cu lo introduci cada 6 luna un reunion di contacto, caminda cu ami como politico, lo responsabilisa mi mes na tur mi sostenedornan y pueblo en general. Na mes momento mi lo splica tambe kico e plannan ta pa e 6 lunanan nos dilanti. Na e manera aki e ciudadano lo tin participacion real den desaroyonan importante pa nos pais y lo no wak e politico solamente e lunanan prome cu eleccion.

 

 

Next Post

POR ta pone Minister Presidente y Minister di Husticia directamente responsable

Tocante entrada di ilegalnan cu droga y arma: ORANJESTAD (AAN) – POR ta pone Minister di Husticia, Arthur Dowers y Prome Minister, Mike Eman, personalmente responsable pa actonan di criminalidad cu ta tumando lugar. Asina e lider di POR Otmar Oduber a señala den conferencia di prensa, den cual el […]