Riba Dia Internacional di Oceano a inaugura un mini-exhibicion di ganadornan di Nature Photography Competition 2021

The content originally appeared on: Diario

ORANJESTAD (AAN): Fundacion Parke Nacional Aruba (FPNA), Post Aruba, Artmando Multimedia y invitadonan a celebra Dia International di Oceano cu un apertura festivo di un mini-exhibicion di e Competencia di Fotografia di Naturalesa 2021 – tema:

Aruba su Bida Marino y e lansamento di e stampia cu e imagen di e ganadornan pa minister Ursell Arends y minister Geoffrey Wever.  

            Un grupo di cinco hurado consitiendo di e ganador di e competencia di aña 2020 Hubert de Cuba, un representante di FPNA y Post Aruba, y dos artista local conoci – Suelyn Dankerlui y Armando Goedgedrag di Artmando Multimedia, hunto a selecta e cinco imagen ganador for di diferente fotografia impresionante: 


Ganadornan Categoria Amateur: 

“Cara” di un ‘Flamingo Tongue’ di Vasco Baselli 

Flotando den e Coriente di Tobia de Scisciolo 

Cangreu di Hulanda di Michael Arends 


Ganadornan Categoria Professional: 

E Turtuga Blanco: Un faborito di local di Kanter Constandse  

E Gengo di Nohemi Habibe 


            World Ocean Day (WOD) ta wordo celebra anualmente riba 8 di juni pa crea concientisacion pa e necesidad di conservacion di oceano. E aña aki, WOD ta boga pa e sosten creciente di e movecion pa proteha 30% di nos planeta su tera, awa, y oceano pa 2030 #30×30, y vocifera na lidernan mundial cu e momento pa actua ta awo – pa un futuro sostenibel pa nos tur! 

            Bishita e mini exhibicion gratis na Post Aruba (Oranjestad) durante e luna di juni y despues e lo pasa diferente luga rond Aruba, finalisando november na Parke Nacional Arikok. Un stampia conmemorativo di e imagen ganador di tur dos categoria por wordo cumpra desde juni 8 na Post Aruba. FPNA tambe lo tin e imagen ganador riba su carchi di entrada annual pa e aña 2022.  

            FPNA y Post Aruba lo colabora un biaha mas pa e Nature Photography Competition 2022, tema: Aruba su Flornan Nativo. Por entrega potret te cu dia 31 di october, 2022.