Reunion Tripartiet a sirbi pa alinea e vision, strategianan y reforsa lasonan di cooperacion

The content originally appeared on: Diario

ORANJESTAD (AAN):  Dialuna a tuma lugar e reunionnan Tripartiet entre Premier di Aruba, Evelyn Wever-Croes, Premier di Corsou,  Gilmar “Pik” Pisas y Premier di St Maarten, Silveria Jacobs.


Hunto tambe den e reunionnan, tabata e Ministernan di Finansas di Corsou y Sint Maarten. Pa Aruba, Minister Xiomara Maduro a wordo debidamente representa pa Prome Minister y Minister Dangui Oduber.

E tema principal di e reunionnan ta e cooperacion entre Aruba, Corsou y Sint Maarten.

            Tabata un dia cu a wordo dedica completo na reunionnan pa intercambia informacion di e situacion di e paisnan, alinea e vision y strategianan y reforsa lasonan di cooperacion, amistad y hermandad entre e paisnan den Reino.

            Prome Minister di Aruba a expresa di ta sumamente satisfecho di con e reunionnan a bay y ta anticipa na e siguiente reunion entre e 3 premiernan di Reino.

            “Un bon reunion caminda ta importante pa compronde con cada pais ta atendiendo cu e retonan financiero, Covid, cu Hulanda y economico pa asina wak unda nos por yuda otro y asina tur tres pueblo sali mas fuerte di esaki. Nos tabata tin un bon reunion cu temanan hopi importante y mi ta sigur cu na final di dia nos por mira bek atras riba un dia hopi fructifero”, Prome Minister a enfatisa.

            Premiernan di Corsou a expresa nan gratitud na Aruba, Gobierno di Aruba y Premier Wever-Croes pa ta e anfitrion di e reunionnan cu a tuma luga.

            Na final di e dia di reunionnan intenso, a tuma luga un conferencia di prensa en conhunto cu e Premiernan di Paisnan den Reino na unda prensa di Aruba, Corsou y Sint Maarten a haya e oportunidad di haci nan preguntanan na e Premiernan.

            “Nos ta mira atras riba un dia hopi intenso cu reunionnan hopi fructifero na unda palabracionnan concreto a wordo haci cu lo yuda nos den e relacion di cooperacion y hermandad. Nos a sali di reunionnan cu energia renoba pa hunto enfrenta e retonan nos dilanti. Mi ta convenci cu Aruba, Corsou y Sint Maarten den union y riba mesun linea lo logra hopi mas beneficio pa bienestar y progreso pa nos pueblonan”, Prome Minister Evelyn Wever-Croes a expresa.