Rene Rosalia lo tene otro siman un charla pa relata e storia di Rignald Recordino

The content originally appeared on: Diario

Organiza pa Fundacion FMC

ORANJESTAD (AAN): Manera ta conoci, como un actividad pa recauda fondo pa Fundacion Mi Cutisa (FMC), y cu ta haciendo esey principalmente pa por maneha Museo Cas Tan Tin,  e  “Concierto Bailabel di Aña” lo tuma luga na Balashi Arena Entertainment Center cu un presentacion di “Doble R Puru” di Curaçao.  Esey lo ta dia 12 di augustus 2022, unda lo tin presentacion tambe di Robert y su Solo Banda Show, y Papito y su Nuevo Sabor.

  Fundacion FMC ademas di esey, ta organiza un charla unda lo bay papia riba trayectoria di e tres musico Rignald Recordino, Robert Jeandor, y Papito Rafael.  Lamentablemente, pa motibo di salud, e charla riba e musiconan di Aruba lo no sigui. Rene Rosalia a acepta e ora pa duna un charla di un ora riba e trayectoria di Rignald “Doble R” Recordino.

   Orador Rene Rosalia:  Antropologo Rene Rosalia, PhD, for di Curaçao a investiga pa hopi aña e trayectoria di Doble R y lo bay tene un charla basa riba un analisis cu el a haci di casi 50 aña di desaroyo musical.

   E lo ta un presentacion riba e nificacion di e trabao musical y balor literario di Rignald Recordino. ‘Doble R’ a produci mas di 500 composicion cu nos hendenan na Aruba, Bonaire y Curaçao, no solamente a disfruta di nan, pero a siña hopi di nan atraves di e mensahenan cu Rignald ta manda den su letranan.

   Entre otro e aña aki Rignald Recordino mes ta publica un buki di su historia musical y cu e letranan di tur composicion cu el a publica.

   Programa dia 10 di augustus 2022: E programa lo ta for di 7:00 pa 9:30 or di anochi y ta conduci pa Addonsito Croes.  Despues di e charla tin oportunidad pa Dialogo y Pregunta. Lo clausura e presentacion cu un recepcion den cura di Universidad di Aruba. Cupo ta limita na 90 persona, pero por sigui e charla riba e facebookpage di Mi Cutisa.   

   Pa papia riba e importancia di e trayectoria y impacto cultural di “Doble R”, Rignald Recordino su composicionnan tin un variacion grandi den su forma di skirbi. Su texto- y topiconan cu e ta uza pa su composicionnan ta tipico di Rignald Recordino. E forma di compone su piesanan, particularmente su forma unico di combina tanto instrumento como e forma di canta un piesa, ta aspectonan completamente inovativo.

   Rene Rosalia lo amplia mas riba e impacto cu Rignald Recordino tabatin riba nivel social y musical pa e tres islanan ABC.

   Educacion Cultural: Mirando cu e charla aki ta forma parti di e desaroyo di Educacion Cultural cu lo bay hunga un rol importante riba tereno di cultura mundialmente despues di e pandemia di Covid 19, FMC a acerca Universidad di Aruba pa coopera cu organizacion di e charla aki.

   Danki tambe na e Comision Nacional di UNESCO y Aruba Bank,  Departamento di Cultura di Aruba. E perspectiva ta cu e charla aki lo haya e interes di varios musico, pero tambe di hopi fanaticonan di Doble R na Aruba. Tambe pa studiantenan di Universidad di Aruba, di IPA y di EPI e charla aki lo tin un balor agrega riba tereno di investigacion y documentacion. Pa tur hende cu ta gusta musica di e islanan Aruba, Bonaire y Curaçao, esaki lo ta un anochi interesante y educativo.