Reforma mas grandi aparato gubernamental tabata na 1986

The content originally appeared on: Diario

Na 1986 A uni dos forsa laboral sin adaptacion debido di LMA — *Cantidad di modelo pa solucion financiero a keda scondi den lachi — *Gastonan secundario di personal di Gobierno ta e problema grandi

ORANJESTAD (AAN) — “Tabata necesario pa un Pandemia uni na un Crisis di Petroleo y un Guera cu por yama mundial, pa Aruba cuminsa papia di su aparato gubernamental cu mester a introduci pa Status Aparte por a bira realidad.”

Na palabra, uno mas di e expertonan cu ta asisti DIARIO den investigacionnan local y internacional, kende a wordo consulta den loke a desemboca den un confrontacion den Reino.

“Prome cu Reino a papia, e problemanan di e aparato gubernamental a wordo discuti den transcurso di tempo cu un cantidad di organisacion experto local of internacional,”el a mustra

E termino “empleado di Gobierno di Aruba” a bira realidad na momento cu Aruba a conoce su Status Aparte Prome di Januari 1986.

“Aruba a bira pais y un pais mester di un gobernacion pero tambe di trahadornan. Prome cu 1986, Aruba como Teritorio Insular tabata tin su trahadornan den tur servicio cu tabata den man di gobernacion insular y tambe su trahadornan den departamentonan cu mester a pone Gobierno di Antia funciona” ta wordo trece dilanti.

Dia Prome di Januari 1986, Aruba a bira pais y asina e “trahador di Gobierno di Aruba” tambe a mira luz.

Trahadornan di Gobierno mester percura pa e pais funciona y duna servicio na Pueblo.

“E separacion di Aruba for di Antia Hulandes tabata e reforma mas grandi di aparato gubernamental di Aruba. Basicamente a uni trahadornan di Antia Hulandes cu tabata traha na Aruba cu trahadornan cu tabata traha den servicio di Teritorio Insular di Aruba y a complementa e resto,” a wordo mustra.

“Landsverordening Materieel Ambtenarenrecht (LMA) di Aruba a wordo introduci na momento cu Antia Hulandes mester a introduci cambio den su areglo cu su personal,” a wordo mustra y esaki tabata e momento cu a habri porta pa loke ta pasa awe.

No por papia di un reforma  total di e LMA, cu a wordo mantene como base y adapta pa personal.

Expertonan a indica cu companianan grandi ta vigila nan maneho di personal y continuamente ta adapta esaki.

Na man di partidonan politico na mando e cantidad di trahador di Gobierno a sigui aumenta loke ta nifica cu e peso di salarionan pa trahadornan di Gobierno a aumenta.

No ta trata solamente di e salario directo di personal di Gobierno, cu ta mara na condicionnan cu e puestonan den Gobierno ta permiti a base di capacidad entre otro cu un miembro di personal mester tin pa e por haci su trabou.

LMA, naci den un tempo colonial, ta inclui diferente beneficio na e trahador, cu mester wordo revisa na e momentonan aki segun expertonan. A mustra riba cierto tipo di “bonus” periodico” y areglonan desconoci na empresa priva.

“Na 1986 a introduci un aparato gubernamental pa un pais. E peso di e aparato gubernamental pa Aruba no ta algo cu awor ta bini dilanti, pero tur experto cu a asisti Aruba a papia di e realidad aki,”expertonan ta indica.

Segun expertonan mester revisa e pakete cu ta ofrece na un persona cu ta drenta servicio di Gobierno.

E pakete aki mester ta pagabel pa Pueblo pero tambe mester refleha cambionan den comunidad.

“Leynan mester wordo discuti y adapta despues di tempo pa sirbi un pais,” ta bini dilanti.

Situacionnan y necesidadnan di un pais ta cambia, a bini dilanti.  Den e añanan directamente despues di Status Aparte, gobernacion mester a vigila na e mihor forma si loke a wordo introduci tabata bon pa futuro.

“Economisa,” tabata e advertencia grandi di instancianan local y internacional cu awe ta haya razon, manera expertonan ta indica.

Manera a wordo mustra na DIARIO, expertonan mester revisa LMA cu ta e base di gastonan di personal y introduci cambionan den loke e pais no por paga.