Recuperacion fuerte di Aruba sigur ta brinda perspectivanan positivo

The content originally appeared on: Diario

Parlamentario Shailiny Tromp-Lee (MEP):

ORANJESTAD (AAN):  Dialuna 1 di augustus 2022  Minister di Turismo y Salud Publico sr. Dangui Oduber a trata den un rueda di prensa e cifranan di turismo pa loke ta trata 2022 te cu awor. Alabes Parlamento ta haya mensualmente e cifranan for di AHATA.

            E cifranan di e ultimo lunanan ta mustra un recuperacion fuerte. Ta trata cifranan cu ta duna un bista cuanto bishitante a yega nos isla den un luna.

            Pa loke ta trata airport nos ta mira crecemento consecutivo di cantidad di bishitante compara cu e aña record di 2019. Cifranan di 2022 ta surpasando e cifranan di aña 2019, esaki sigur pa e tres lunanan tras di lomba.

            Cifranan ta mustra cu den luna di april di e aña aki a registra un recuperacion di nos turismo di 108% porciento compara cu april 2019. Tambe ambos luna di mei y juni a registra e mesun cifra di recuperacion cu ta 103% porciento compara cu respectivo lunanan den aña 2019.

            Pa e promer 6 lunanan di aña 2022 Aruba a ricibi 528.325 turista. Esaki ta un recuperacion di 92%! Aruba ta e di dos pais den mundo den recuperacion di turismo. Sigur esaki ta demostra cu nos ta un pais hopi resiliente. Un desaroyo sumamente positivo y hopi necesario pa nos pais y cu sigur ta brinda perspectivanan hopi positivo.

            Asina nos pais por bin mas lihe bek riba pia, nos lo ta menos dependiente di Hulanda, e caha di Gobierno por recupera y yuda absorba consecuencia y desaroyonan mundial negativo cu ta tumando lugar manera impacto di e guera na Europa, prijs di crudo y scarcedad di producto.

            Na mes momento e recuperacion aki tin un efecto positivo riba nos economia, caminda negoshinan tambe ta bay recupera mas lihe, cuponan di trabou ta keda crea y ta brinda oportunidadnan na nos famianan den necesidad.

            Mi ta convenci cu e recuperacion aki ta fruta di un bon maneho door di tur stakeholders den turismo, ta resultado di e decisionnan tuma cu curashi door di Gobierno y henter e crisis team y mas cu tur cos ta demostra e trabounan duro y excelente cu diariamente nos hendenan ta haci den e sector turistico.

            Turismo ta keda e driver di nos economia. Nos mester keda brinda nos bishitantenan e servicio di calidad y e experiencia di seguridad cu nos isla ta conoci pe. Esaki ta trahando hunto so nos por sigui logr’e.