Recuperacion economico mundial despues di 2022

The content originally appeared on: Diario

OPEC ta rechasa cu prijs di petroleo ta causante problemanan — *Personanan no vacuna ta causante di explosion di Covid-19 — *Aruba pendiente pa problemanan comercial mundial creciente


ORANJESTAD(AAN)—Cada dia nobo di November, ta trece fin di 2021 mas cerca.  Si na final di 2020 mundo tabata tin speransa cu 2021 lo conduci na inicio di un epoca nobo, informacionnan internacional y local cu DIARIO ta ricibi, ta mustra cu 2022 lo bira sumamente dificil y cu expertonan mundial ta mira cu 2023 lo por trece recuperacion economico pa mundo.

Importante den e desaroyonan cu mester spera na 2022, ta e problemanan cu comercio internacional ta confronta den produccion y entrega di articulonan.

E asina yama “international supply chain”, e cadena cu ta haci cu un articulo ta wordo produci y entrega na un cliente di un productor of bendedor, ta sigui conoce problema serio.

Durante ultimo lunanan, e prijsnan di petroleo a wordo considera e problema mas serio cu ta existi pa aumento di costo di sigur transportacion.

Ayera OPEC a reacciona y a mustra cu sigur e paisnan Europeo y Merca, mester busca e motibo pa desaroyonan mundial cerca nan mes.

OPEC no ta bandona su propositonan y ta mantene su mes na su produccion actual.

E declaracion di OPEC a bini riba mes dia cu mas cu 100 pais na e Cumbre di Clima na Glasgow, a mara nan mes na buskeda di energia limpi pa reemplasa petroleo, gas y carbon pa 2050.

E forma cu comercio internacional ta pega, prijs di transportacion ta aumenta y ta afecta prijsnan rond mundo, no ta e unico problemanan cu cual mundo lo drenta 2022.

International Monetary Fund algun siman pasa a confirma informacionnan di DIARIO y a mustra cu mientras e peliger di Covid-19 keda presente, economia internacional lo sufri.

DIARIO ta den contacto continuo cu su fuentenan den exterior. E expertonan ta mustra cu no por spera un solucion final pa inflacion den un instabilidad mundial ocasiona pa cantidad di problema.

E “Pandemia di personanan no vacuna” manera e ola nobo di Covid-19 ta wordo yama, ta causa un instabilidad grandi pa mundo y lo sigui afecta produccion pero tambe resultadonan economico manera cifranan di turismo.

Aruba mester vigila e forma drastico cu e cantidad di casonan nobo di Covid-19 na Europa ta aumenta y na cierto paisnan hasta ta surpasa e cifranan cu originalmente a wordo registra pa e malesa.

Esaki ta relata na e cantidad di personanan cu ainda no a vacuna, ta nenga di sigui reglanan y ta nenga di tene na consideracion e peliger grandi cu nan ta crea.

Informantenan riba tereno laboral internacional, ta indica na DIARIO cu cifranan internacional di desempleo ainda ta sumamente halto loke ta haci cu e cantidad di persona cu por sostene economia ainda no a alcansa e nivel spera originalmente pa November 2021.

Importante ta cu hospitalnan rond mundo mester corta nan cuido normal pa dedica tur atencion na pashentnan di Covid-19.

Mientrastanto companianan mester recupera perdidanan grandi cu nan a hiba durante e pandemia pero tambe den un epoca cu a spera un crecemento economico cu no a presenta

Informantenan local y internacional a splica DIARIO cu Aruba mester keda den estado di alerta pasobra ainda mundo ta den problema serio riba tur tereno.

E hecho cu mas y mas ta pone 2023 como termino pa spera recuperacion economico, ta indica cu 2022 lo ta sumamente dificil.

Hopi plannan comercial y social lo stop di existi ya cu no tin fondo mas riba plataforma internacional.

Paisnan mester a uza parti grandi di nan reservanan. Cada dia cu recuperacion wordo tarda den e situacion sumamente dificil na mundo, ta uno mas di preocupacion serio.

DIARIO ta den contacto cu su expertonan local y internacional y lo sigui guia Aruba na caminda pa un futuro mundial cu ainda mester confronta basta dificultad.