Recidivista a tira y hinca su mesun tata mata na Rooi Bosal

The content originally appeared on: Diario

Jason Mathilda ta comete e di dos asesinato di su bida


ORANJESTAD (AAN): Tabata Dialuna madruga banda di 2:00 am, cu informe a drenta na Central di Polis, cu na un cas na Rooi Bosal un yiu a tira y hinca su tata.
   Cu urgencia un patruya di Santa Cruz a mobilisa na e adres.  Na e yegada di patruya, e personanan cu tabata ainda na dicho cas, a confirma cu algo serio a socede.  Nan a core conta patruya cu enberdad e conocido Recidivista Jason Mathilda cu ta biba den un Apartamento na e adres ey, tabatin den madruga un discusion cu su tata, y despues di esaki el a pasa man pa arma di candela, los un tiro den direccion di su propio tata.  Comosifuera esey no ta suficiente, despues el a usa un obheto skerpi y a bay hinca e tata tambe cune.

    Despues di a realiza kico el a caba di haci, Jason mes a hinca e tata den auto y transporte pa Hospital.

    Mientras tanto, Departamento Tecnico di BFTO di Cuerpo Policial, Recherche Santa Cruz, y Slachtofferhulp a bay na e lugar.

   Polisnan a bay Hospital tambe, pero aki a bin compronde cu na yegada aki, Docternan no por a haci nada y a djis constata morto di e tata.  Pa 2:25 am, Docter a constata morto.

   El a wordo identifica como Eugenio Carel Mathilda, naci na Aruba dia 21 di November 1967, pues tin 54 aña di edad.
   Lito Lacle cu ta vocero di Polis, a confirma cu na Hospital mes autoridadnan a detene e sospechoso Jason Anthony Mathilda di 31 aña di edad.

   Jason a wordo transporta pa Hospital, pa asina keda deteni.

   Jason Mathilda ta e persona kende riba Dialuna 11 di October cu a pasa, a horta un Waverunner y a keda core rond cune na costa zuid di Aruba pa varios momento largo, insultando tur Polis, tur miembro di prensa, y a hasta desvia intentonan di Guardacosta pa por a intercepte.

   Lo mas serio di dje, ta cu Jason den pasado a yega di mata un persona caba, na e cruzada di Belgiestraat/Santa Helenastraat banda di Bam Bam Cafe na aña 2010.  Pa e asesinato ey, el a ricibi un castigo di 8 aña di prison.

   Awor pues a keda demostra, cu e castigo di Huez aki no a yuda cu nada!  El a sali den libertad na 2018, y apenas 3 aña despues e ta bolbe comete un asesinato, y e biaha aki riba su propio tata.

   E observacion a sali tambe, cu Jason tin un papel di conducta hopi mancha mes, cu varios crimen chikito.  Pero awor e ta bay haya e di dos asesinato riba su cabez.  Algun ta mustra cu e ta victima di e sistema na Aruba, unda cu no tin suficiente espacio pa atende hendenan cu ta pasando den dificultad cu salud mental.  Tin cu ta insisti cu kizas, bao di guia podiser Jason lo por a cambia su bida.

  Pero ta ser mustra cu for di chikito caba el a lanta den e ‘ambiente’ ey di sinti poder cu arma di candela a-la-Gangster y lo no cambia hamas.  Na 2019 tambe el a participa den un atraco arma.

  Pueblo a reacciona cu shock pa cu e noticia di un persona ta mata su mesun tata.  Hopi ya caba ta exigiendo castigonan mas grandi, incluyendo di bida largo.  Otronan ta pidi compasion y mas comprondemento pa cu e asunto di salud mental.

   Na famianan di e fayecido, DIARIO ta extende su mas profundo palabra di condolencia.