Recicla ta bira exigencia urgente

The content originally appeared on: Diario

Prijsnan mundial di produccion producto nobo ta sigui subi — *Balor di tur producto ta subi y ta exigi mentalidad nobo — *Prijsnan halto ta dimension nobo na necesidad clima

ORANJESTAD(AAN)—Recycle.  Esaki ta e palabra cu a wordo uza mas y mas na momento cu Aruba mescos cu henter mundo tabata busca un solucion pa medio ambiente.

E ceronan di sushi cu ta causa problema rond mundo, mester a haya un solucion en bista di e preservacion di naturalesa y e peligernan di cambio di clima.

Awor un factor nobo ta presenta su mes cu ta e prijsnan sumamente halto cu mundo mester paga pa produccion di articulonan, cu awe ta considera sushi.

Mientras informacionnan sumamente serio riba resultadonan cu e caida economico mundial lo tin pa tur pais na mundo, tabata sigui drenta, DIARIO a atende cu expertonan cu a mustra cu hende lo mester baha su gastonan.

Esaki ta nifica cu menos wordo gasta y cu mester tene cuenta tambe cu e problemanan serio cu produccion ta trece cune.

Mientras hopi atencion ta wordo dirigi riba prijs di petroleo y su impacto riba prijsnan mundial, tin otro factornan sumamente importante cu ta manda prijs halto y ta haci articulonan mas costoso.

Informantenan a papia di produccion cu a tranca pero tambe transportacion di productonan cu no por alcansa nan mercado di destino.

Na mes momento mester tene na consideracion cu Rusia tabata un pais cu tabata produci cantidad di producto cu awor no por alcansa otro destinacionnan.

Informantenan a splica cu mester bolbe for di inicio di guera ora a introduci seguro special pa barconan cu tabata nabega den e teritorionan cu a bira peligroso.

Seguro a afecta prijsnan mientras medidanan cu a tuma contra Rusia a cera porta pa basta productonan basico pa industrianan na diferente pais.

Scarcedad di producto a bira realidad den tempo di Covid-19 cu ainda ta afecta cantidad di region den Oriente conoci pa produccion pa mercado internacional.

Fordi 2021 e problemanan petrolero mundial a manda prijs halto y awor e situacion di Ukraine ta sigui afecta prijsnan rond mundo.

Recicla mester bira costumber, a wordo mustra dor di informantenan cu ta bisa cu awor sigui sosten mester wordo duna pa e esfuerso di Gobierno actual, manera presenta den e programa di accion tambe di Minister Ursell Arends.

“E balor di sushi a subi,” un informante a indica y a bisa cu cantidad di baki di sushi yena cu articulonan cu por haya mas uzo.

E ora pa bolbe practica e base di “recycle” a yega segun informantenan cu a splica cu mester tene na consideracion cu diferente producto lo conoce scarcedad.

Prijsnan lo sigui subi y lo haci cu hopi producto lo no ta alcansabel mas.

DIARIO ta en espera di mas informacion especifico riba e tereno aki pero mester bati alarma pa aumento importante di prijs cu ta sostene e necesidad di recicla.