Recesion mundial por marca temporada halto di turismo

The content originally appeared on: Diario

Aruba mester ta alerta y comunidad mester prepara su mes —Perdida di balor di placa ya ta un hecho cu ta mishi cu entrada — *Aumento di prijs ta marca di un era di pandemia y guera sin fin

ORANJESTAD(AAN)- Ya casi mitar di e luna di Juni 2022 ta tras di lomba. Tempo ta nay cu rapidez pero cu mes of mas rapidez situacionnan dificil ta sigui bati na porta di mundo y asina na porta di Aruba.

Juni ta luna cu ya tur hende a cuminsa prepara pa temporada di vacacion di school, di preparacion pa entrada pa un aña escolar nobo cu tur gastonan cu esaki ta encera.

Despues di vacacion, Aruba lo cuminsa prepara pa entrada na loke ta conoci como e temporada halto di turismo, cu ta produci entrada pa un cantidad halto di famia na forma directo of indirecto.

Na e momentonan aki, bistanan mester ta dirigi riba loke por pasa y segun pronosticonan mundial ta wordo spera den temporada halto di turismo.

Ta hustamente na final di 2022, ta spera cu recesion lo bati na porta mundialmente loke lo afecta entrada di tur hende.

Ya na Aruba por nota con prijsnan ta subi y nan mester subi a base di e gastonan pa produccion y transportacion entre otro cu ta sigui subi, pero tambe pa motibo di e hecho cu paisnan Asiatico cu ta percura pa produccion di tanto producto, ta keda den gara di Covid-19 cu a haci cu atrobe medidanan mester wordo tuma y hasta lock down ta bira realidad atrobe.

Na e momentonan aki, cifranan ta indica con tur dia bida ta bira poco mas caro na planeta mundo.

E aumento continuo di costo di bida, ta inflacion. Productonan ta bira mas caro. Hende mester di mas placa pa cumpra un articulo. Prijs di servicionan ta sigui subi y asina ta afecta otro prijs.

Ban tuma un ehempel. Mester di cierto ingredientenan pa traha un producto. Na momento cu prijs di e ingredientenan aki subi, e prijs di e producto tambe ta subi.

Aruba ya ta sinti diferencia den e cantidad di placa cu e tabata tin mester pa su gastonan basico y loke awor e mester gasta pa por cumpra mes productonan cu ya a aumenta den prijs.

Prijsnan lo sigui subi segun tur pronostico, pues e asina yama proceso di inflacion lo continua.

Na luna di Juni, ya por nota cuanto placa mas mester pa haci compra. Ora un aña escolar nobo bati na porta, prijs a bira mas halto y lo ta un peso mas grandi.

Prijsnan lo sigui subi rond mundo, cu ta spera na na caminda pa fin di 2022 mundo lo conoce un recesion, cu ta nifica perdida di balor di placa y bienes, cu lo bira un peso mas grandi pa hende y pa tur pais.

Ora papia di inicio di temporada di turismo, ta papia hustamente di e temporada cu segun expertonan mundo lo causa un recesion na mundo, un caida economico, cu lo afecta comunidad mundial.

Ora tira un bista general riba 2022, mester conclui cu e parti mas facil di 2022 ta tras di lomba y cu e parti mas dificil ta nos dilanti y probablemente lo manifesta su mes den e temporada halto di turismo.

Un comunidad mester ta prepara pa e pio escenario. E situacion mundial no ta mehora pero ta empeora y na paisnan grandi manera Merca ta papia di recesion.

Kico informacionnan relevante ta nifica?

Turismo 2022 y 2023 tin un chens grandi di wordo afecta dor di e situacion mundial y cu turismo, tur entrada y servicio cu ta depende di turismo, incluso entrada nacional.

Informacionnan cu ta alcansa nos diariamente ta duna un indicacion. Mester prepara awor pa loke ta bini, no pa Aruba so, pero pa henter mundo, afecta pa recesion, cu probablemente lo alcansa un punto importante, na entrada di temporada di turismo.