Recesion lo afecta cada sector na forma diferente!

The content originally appeared on: Diario

ORANJESTAD(AAN)—“Na un forma artificial paisnan grandi a atende cu inflacion, causa pa aumento di prijsnan. Miedo pa un recession cu lo cambia bida pa uno y tur riba planeta mundo, ta dirigi hasta e prijs mundial di petroleo cu tabata origen tambe di e actual costo di bida mundialmente.”

Faltando tres siman pa Aruba cuminsa despedi di 2022, DIARIO ta continuamente den contacto cu Capitannan di Industria y expertonan local y internacional, cu ta sigui bati alarma grandi pa loke ta den porta.

Ayera prijs di petroleo a baha na un forma drastico y esaki tin diferente

motibo.

Uno di e motibonan principal ta keda na nivel internacional, cu e prijs halto di petroleo ta causa e peso di inflacion, cu ta afecta henter economia mundial, manera na cantidad di ocasion DIARIO ya a adverti.

Expertonan cu ta asisti DIARIO den compilacion mundial di informacion pa sirbi e lectornan di DIARIO, ta mustra riba e realidad cu cantidad di companianan mundial grandi, ta manda trahador cas.

Corto tempo pasa, DIARIO tabata comparti e preocupacion causa pa e cantidad di companianan cu ta haci negoshi via internet y ta competi cu negoshinan local debi na e hecho cu nan no tin e gastonan ni ta brinda e calidad cu compania local mester brinda.

Awor ta resulta cu hasta companianan cu ta participa na E-commerce, negoshi riba internet, ta tuma medida pa baha nan gasto debi na caida di demanda. Tin negoshi grandi riba e tereno aki, cu a cuminsa manda nan trahadornan cas.

Motibo di medidanan na companianan internacional poderoso, ta cambionan cu a presenta den e sector di e-commerce cu tambe ta wordo afecta pa e prijsnan di energia y inflacion.

Proyectonan internacional grandi ta wordo tranca. Un pais poderoso manera Alemania, ta suspende su proyecto di terminal flotante di gas.

“Mundo ta den gara di crisis economico y financiero, como resultado di e aumentonan enorme di prijs cu a deshaci di calidad di produccion y di bida na mundo,” informantenan ta mustra.

“Placa a perde balor den e proceso. E hecho cu costo di bida a subi, ta haci cu cada persona ta reduci su gastonan y asina ta afecta diferente sector,” ta bini dilanti.

Na momento cu companianan cu ta atende cu benta di cuminda cuminsa mustra cu nan benta a baha, alarma grandi a wordo bati manera ta bini dilanti.

Kico ta haya preferencia y ora hende cumpli cu su gastonan basico manera pa cuminda, vivienda, pa no papia mes di loke ta gasta energia, kico ta resta pa e gasta na otro negoshi?

Esaki ta e peliger grandi cu ta bini dilanti mundialmente na momento cu mundo a drenta un temporada durante cual generalmente dianan di fiesta ta percura pa aumento di entrada pa negoshinan.

E placa cu comercio ta ricibi di publico cumprador ta dicidi cuanto placa e comerciante tin pa sigui haci negoshi, cu ta su entrada.

Si entrada di comercio no por cubri e gastonan, comercio mester tuma medida cu ta nifica cu e ta aumenta prijs of por ehempel ta deshaci di personal cu ta uno di e gastonan mas halto generalmente pa comercio.

Cifranan cu DIARIO ta ricibi pa papia di un situacion serio, dificil pa enfrenta debi na e riesgonan grandi cu ta afecta cada sector comercial na forma diferente.

“Pa haci negoshi ta compila cifranan. Mundialmente (na Aruba tambe) e cifranan cu a wordo calcula pa 2022 y 2023, no ta cuadra mas cu realidad,” ta bini dilanti.

E placa cu mester drenta caha comercial pa por wordo gasta y pone economia move, no a drenta den hopi caso na nivel internacional.

Un consumidor tin cierto suma di placa na su alcance. Den situacionnan manera genera pa desaroyonan mundial actualmente, e consumidor ta scrap cierto gastonan segun su preferencia pero ta afecta e totalidad di resultado comercial.

E prome paso cu mester wordo tuma segun informantenan ta, cu placa di Aruba ta keda Aruba . Mester atende cu salida di placa y mester cuminsa informa Pueblo na forma debido.

E calidad di productonan cu ta wordo ofrece den E-commerce no tin e garantia di e productonan local cu hende ta mira prome cu nan haci e compra. Bentaha importante, pues.

Pero mester aumenta e defensa di produccion local enfrente loke ta drenta, pa asina Aruba por confronta loke a rementa na pais grandi, cu ta resultado serio pa trahadornan cu mester bay cas y negoshinan chikito cu no por tene cabez riba awa mas, ta cera nan porta, den un economia di “bari sin bom”.