Razzia na Dakota pa detene dos sospechoso di atraco violento

The content originally appeared on: Diario

Atraco a socede na Eagle Beach


Diabierna a detene e di tercer sospechoso
Caso di atraco violento a wordo soluciona 

ORANJESTAD (AAN): Autoridadnan hudicial ta sigui investiga crimennan di impacto grandi, y ta logra gara malhechornan tambe.

   Diaranson cu a pasa, den oranan di madruga e Atraco Team (TBP) hunto cu team di Aresto a tene un razzia na Amandelstraat.  Na e accion inespera aki den marduga na Dakota, tabata presente unidadnan di K9 Unit y tambe Flex Team.

   E razzia aki ta den cuadro cu investigacion rond di e caso di atraco riba un dama cu tabata canando banda di Eagle Beach y na unda dado momento e lo worde atraca y hinca. 

   Den e razzia aki a logra detene dos sospechoso.  Vocero di Polis a confirma cu den e Entrada Hudicial, a detene e homber S.C.T. naci na Aruba, y M.F.L.S. naci na Colombia.

   Otro detencion mas: Ta parce cu e dos hendenan aki a ‘basha abao’.  Pasobra asina a haya mas informacion, y di biaha riba Diabierna mainta, e departamento di Atraco Team (TBP), hunto cu personal di K9 Unit a mobilisa ora cu a haya sa cu un sospechoso mas a caba di drenta un Supermarket den Avenida Milio Croes, net ora cu ta preparando pa sali cu Parada Escolar na Playa.

   Fotografo di DIARIO tabata presente ora cu na Dakota a detene e hoben menor di edad, y tin e potretnan EXCLUSIVO aki.  Vocero di Polis a confirma cu e hoben di inicial S.S.T. di 17 aña di edad, a resulta di ta meti den e atraco violento aki.  A core busca Vehiculo di Transporte, y bao vigilancia estricto e hoben peligroso aki a wordo hiba Warda di Polis.

   El a wordo hiba dilanti Fiscal Auxiliar, kende mesora a duna ordo pa e keda deteni.

   Cu esaki tambe, Atraco Team a logra resolve e caso di atraco aki riba un señora cu tabata jog anochi laat banda di Eagle Beach.

   E caso mes: Tabata Dialuna 15 di Januari 2024 basta laat, esta pa 11:58 pm, casi mey anochi, e yamada a drenta na Central di Polis cu un atraco violento a caba di socede na Eagle Beach, den e area pabao di Paradise Beach Villas.  Mesora a manda unidad di Polis di Noord pa e lugar.

   E prome unidad di Polis cu a yega na e lugar, a bin topa cu e dama victima y a mira cu e ta herida.  Mesora a pidi pa Ambulans yega eynan.

   E victima a bisa cu e tabata haciendo ehercicio eynan y tabata jog (core), y diripiente un homber a bula su dilanti cu un cuchiu apunta riba dje, y a comete atraco.

   E dama a splica Polis, cu el a trata di resisti y a hasta lucha cu e atracador bisti full na preto, y aki ta unda cu e atracador a haci mas esfuerso y a hink’e.  Despues di esey e atracador a ranca y kita su smartphone for di dje, y a core bay di e lugar, y a huy bay panort den un auto shinishi.

    Ambulance a yega na e lugar, unda paramediconan a observa e herida, y despues di a stabilisa esaki, nan a dicidi pa hibe mesora pa Servicio di Emergencia na Dr. Horacio Oduber Hospital.