Razzia den marduga na cas na Bushiri pa detene otro sospechoso di mata Juni Carty

The content originally appeared on: News Americas Now

Black Immigrant Daily News

The content originally appeared on: Diario

ORANJESTAD (AAN): Manera ta di spera, oficialnan hudicial di Departamento di Recherche di distrito di Noord (conoci como Departamento DAR-2), a sigui profundiza nan mes riba e crimen hororoso cometi Diadomingo marduga den bista di decenas di hende na Palm Beach.   Esey ta ora cu a los tiro riba e homber Anthony Alexander Carty, mihor conoci como Juni di 31 aña.  El a cay eybao riba e zebrapad entre BARU Lounge y Brutto Aruba Restaurant, y casi no tabata hala rosea mas, y despues a fayece.

   E mesun marduga,

Polis hunto cu Team di Aresto a sa di detene e persona di 17 aña di edad na un Apartamento na Saliña, y e ta wordo considera como e persona cu a los tiro.  Te ainda oficialmente Polis no a duna nomber ni inicial di e hoben aki.

   Recherche a sigui cu e investigacion, y a bay riba un pista cu ta indica cu lo tin un hende mas envolvi den e asunto aki di pustamento di boca y tiramento dilanti BARU Lounge, cu antes tabata conoci como Sand Bar y tambe Sand Aruba.

   Vocero di Polis Lito Lacle, a confirma Diahuebs merdia, cu Recherche a ehecuta un ordo di detencion, y a aresta un homber di inicial A.J.H.R., di 18 aña y naci na Aruba.

   Bao guia di Fiscal y acompaña pa Huez Comisario, Diahuebs marduga a tene un razzia na un cas na Bushiri y aki a detene e di dos sospechoso den e caso di asesinato.  Mirando e embergadura di e caso, Recherche a haci uso di Team di Aresto pa a aresta e sospechoso durante e entrada hudicial aki na Bushiri.

    No ta conoci si acaso a haya algo di importancia den e cas aki durante e razzia.

    Segun Lacle, pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nan ta pidi si bo tin cualkier informacion yama nos tiplijn: 111-41. Nan ta garantisa cu bo ta keda anonimo.

NewsAmericasNow.com