Randall Croes di SPCOA a splica Formador di kico nan HAVO Traject ta consisti

The content originally appeared on: Diario

ORANJESTAD (AAN) — Randall Croes di SPCOA,  a sigui relata den conferencia di prensa relaciona cu e reunion cu Formador Evelyn Wever Croes,

cu nan a papia tambe di digitalizacion, cu ta algo cu no por para y cu SPCOA ta tuma cu braza habri, pero cu mester adapta tanto nan clasnan y ekipo cu e boardnan digital y enseñanza, cu ta bin den un combinacion digital y por escrito.

“Pero mas importante ta cu mester pone atencion na e maestronan, cu mester adapta y siña traha cu e sistemanan nobo aki di enseñanza. Esey ta laga nos tambe miho prepara pa cualkier acaso cu nos mester bolbe duna les di scol na cas y pesey mas pronto posible nos mester drenta den e era digital akinan”, Randall Croes a señala.

Randall Croes a referi tambe na un discrepancia cu tin entre e desaroyo economico y scolnan cu SPCOA tin tanto pariba como pabao, unda e inversionnan cu el a menciona prome, ta importante pa balansa nan.

El a agrega cu nan a ofrece e HAVO traject na nan alumnonan, pa asina tambe duna den un Organizacion, cu e alumnonan por cuminza for di Kleuterschool te ora nan bay Universidad.

“Asina ta cu ofreciendo MAVO y HAVO, EPI, Universidad y otro programanan profesional despues di scol PSCOA kier dune e pakete completo y esaki ta un perspectiva pa nos alumnonan cu nan por sigui den un ambiente conoci, cu nan maestronan, e director, e organizacion, etc”, Croes a relata.

A wordo menciona e tema di profesionalizacion di e docentenan, no solamente den e parti digital pero tambe den nan materia y pa nan adapta na e leerstof nobo, un sistema di enseñanza cu SPCOA kier inverti den dje pa modernice pa asina tin un miho bista con e muchanan ta desaroya nan cifranan y tur loke ta sosode cu nan, pa nan tine “on the record” durante henter e periodo di kleuterschool, MAVO, HAVO, etc. Den tur esaki SPCOA tin un bon cooperacion cu Departamento di Enseñanza, pa asina nan programanan educativo ta cuadra cu e programanan nacional y plannan educativo cu ta bin na nivel di gobierno y e Ministerio.

“Nos a entrega un lista di prioridad cu detayenan pa loke ta infrastructura di e scolnan pa asina gobierno, Formador cu a ricibi nos hunto e partido cu ta bay forma e coalicion nobo aworaki, pa nan ta na haltura di esaki y pa nan comunica tur e necesidadnan aki na e departamentonan concerni”, Randall Croes a conclui.