Rampenbestrijding ta hayando varios Tent special pa haci uso den caso di calamidad

The content originally appeared on: Diario

Obsequio di Gobierno Mericano

ORANJESTAD (AAN): Den un intento pa yuda e islanan den Caribe ta mas resiliente den diferente situacion of calamidad cu nan enfrenta, Gobierno di Merca ta sigui duna sosten na e paisnan aki cu material cu por wordo usa den caso di emergencia.

   Recien Aruba a ricibi diferente cargamento di Tentnan grandi cu ta wordo usa den situacionnan di emergencia.

   Rino Hermans di Bureau Rampenbestrijding Aruba (BRA) a bisa cu e Tentnan aki a yega Aruba, y un representante di e fabrica a bin tambe pa asina duna un training con ta habri, usa, mantene, y despues warda nan.

   Personal di Departamento di Logistica di BRA a participa na e training pa mira con e proceso ta, prome cu finalmente e Tentnan a wordo entrega oficialmente.  Cada tent ta bin den un box portatil cu ta bon sella.  E training a duna oficialnan na Aruba un bon imagen tambe con bon e isla ta prepara, of kico mas tin di haci pa adapta, pa por ta cla pa cualkier eventualidad.

   E training a socede Diamars mainta, net ora cu un Ola Tropical tabata pasando den e area di Aruba, treciendo un bon scenario pa e personal a siña bao di un yobida constant, ta con ta hisa e Tentnan.  A bay haci e training riba parkinglot di ex-Bushiri Beach Resort pazuid di Lloyd G. Smith Boulevard.

   Importancia di e Tentnan: E nomber oficial di e Tentnan aki ta ‘Rapid Response 18’, cu nifica cu den mey ora di tempo bo area ta operacional, den caso cu bo tin di lanta un zona di Comando pa yuda coordina cualkier rescate of eventualidad.  Pues sea ta pa Comando, of bo mester di dje pa forma un Triage (veld Hospital).

   E Tentnan cu Aruba ta ricibi ta bin den 3 diferente cargamento.  Esun aki a yega awor na Juni 2022, y e di dos cargamento lo bin na October 2022, y e di tercer lo yega na Maart 2023.

   Despues di Maart 2023 pues, Aruba lo por tin un Veld Hospital completo cu capacidad pa 60 pashent, haciendo uso di e Tentnan aki.

   Departamento di Logistica di BRA lo keda encarga cu e Tentnan aki.  Pues si otro Departamento tin di haci uso di nan, ta e personal di Logistica lo bay yuda habri nan, mantene nan, y despues cera nan bek.

   BRA tin departamentonan specializa den un materia, y cada uno ta keda encarga pa cierto asunto.  E armamento di tent a cay bao di esnan di Rapid Response Logistiek.  No lubida cu DOW tambe ta yuda BRA cu e parti logistico y equiponan pisa.

   Tent ta hopi resistente: E Tentnan aki ta wordo usa pa Defensa Mericano riba veldnan di Afghanistan.  A haya mesun tipo y calidad.  Pero biento di Aruba bo tin di tene consideracion con ta arma nan cu e biento ta supla duro.

   E hecho cu a bay haci e training riba tereno di parkinglot di ex-Bushiri Beach Resort ta debi cu e ta un tereno habri, y biento semper ta dal duro eynan.  Esaki tabata ideal pa haci e training di arma e Tentnan bao di e situacion ‘normal’ di biento na Aruba.

   Pa casualidad awa tambe a yobe duro, cu ta net un bon chens.  Asina BRA por a mira loke ta e potencial di e Tent.