Radio Emisornan a reuni cu Minister Geoffrey Wever

The content originally appeared on: Diario

Riba e asunto di DucaPro…

ORANJESTAD (AAN): Riba Diabierna, e directornan di Radio emisornan di Aruba a reuni cu Minister Geoffrey Wever di asuntonan di Telecomunicacion y Economia pa asina presenta nan obhecion contra di e intencion di Abogado David Kock y Ducapro/Buma Stemra di kier cobra radio emisorananan pa toca musica, e asina yama Royalties pa creadornan di musica.

   Radio Emisoranan a duna un splicacion na Minister Wever cu desde introduccion di Internet; YouTube y tur otro medio musical y social, emisoranan a sufri golpinan masha duro den cantidad di audiencia y nan entrada. Pa hopi radio emisora, mas gasto di operacion kiermen sla mortal.

   Abogado David Kock a laga sa cu e ta representa Ducapro y Buma Stemra di Hulanda kendenan lo ta esnan cu lo ricibi e entradanan cu lo wordo cobra pa despues reparti pa e artistanan. Pero ta bon pa menciona cu unabes cuminsa cobra e Radio emisoranan, tur otro negoshi cu ta toca musica pa anima of background music tambe mester bay paga, manera un Café, Bar, Restaurant, DJ, Nightclub y tambe na actividadnan Deportivo of social. Nan lo mester haya licencia y paga Ducapro-Buma Stemra entrante 1 di Januari 2024.

  Pues na un manera abrupto y cu hasta menasa di tuma pasonan na interes di e instancianan concerni a manda carta pa doñonan di Radio. Gerentenan di emisoranan a pidi e Ministro di Telecomunicacion pa considera e argumentonan presenta durante di e reunion pa asina por interveni y yega na un solucion cu ta na bienestar di emisoranan y tur otro instancia cu ta uza music na Aruba.

   Radio emisornan ta respeta derechonan di autor y artistanan, sinembargo Radio emisoranan ta di opinion cu esaki no ta e manera pa impone un gasto nobo pa e emisoranan of otro instancianan. Presente tabata Omar Steve Lejuez di Heart 106.7 FM, tambe Johny Habibe di Hit 94 FM y Mega 88 FM, Aldrich Croes di Hits 100 FM, Juan Carlos Sonri di Caliente 90.7 FM, Farrah Boekhoudt di Vybes 103.5 FM, Wouter Gesterkamp di 97.9 Easy FM, DJ Corsow tambe pa Blue 107.5 FM, y Erin Croes di Magic 96.5 FM.