Radar nobo ta yuda intercepta cargacion grandi di droga

The content originally appeared on: Diario

Parlamentario Marco Berlis (MEP):

ORANJESTAD (AAN): For di comienso di Gabinete Wever-Croes-II por a wak minister di Asuntonan Social y di Husticia, sr. Rocco Tjon move cu hopi vision, dinamismo y determinacion pa ahusta, mobilisa y inverti den diferente proyecto cu nos pais mester.

            Un di esakinan ta e radar extra cu minister Tjon a laga cumpra pa monitor lanchanan y hendenan cu kier ingresa Aruba cu arma, droga y hende di un forma ilegal. E inversion y vision aki a cuminsa duna fruta inmediatamente.

            Diasabra marduga, dia 23 di juli 2022,  por a wak e noticia unda cu radarnan a capta movecionnan sospechoso den nos lama teritorial. E movecion aki a haci cu kustwacht a actua mesora y a logra haya sa cu ta un boto ta biniendo den direccion di Aruba. 

E operacion riba lama ta duna resultado.

            Diferente departamento hudicial a cera cabes y a haya e cooperacion di Maritieme Operations Center kende a duna ordo pa e Metal Shark di Aruba bai investiga e boto aki. Un persecucion a sigui cu a termina den e captura di esaki, cu tabata tin 400 kilo di droga abordo. E personanan y e caso ta awor den mannan di Cuerpo Policial su departamento di Crimen Organisa, cu lo sigui cu e investigacion.

            E logro aki ta demostra e importancia y e prioridad cu mester tin pa sigui inverti den radarnan rond di Aruba pa asina garantisa siguridad di nos costanan y nos pais. Sigur, e ta di aplaudi e bon trabao di tur departamento envolvi den e caso aki!

            Ta den e cuadro aki Minister Rocco Tjon a anuncia cu pronto Aruba lo haya su di tres sigui pa su di cuater radar y asina sigui reforsa y mehora e siguridad na nos fronteranan! Mientrastanto nos ta wak cu Kustwacht ta sigui score contra contrabando di droga!


AVP a kita radar y siguridad na nos fronteranan!

            Mester añadi cu ta remarcabel cu durante gobernacion di AVP Arthur Dowers a haci net lo contrario como minister di Husticia. Awendia Dowers ta grita tocante insiguridad na Aruba, mientras e mes a entrega siguridad di nos pais 8 aña largo na criminalnan. Con e la haci esaki? Mas grandi su hipocresia no por ta;

 

Arthur Dowers a kita e radarnan Raytheon y asina nos fronteranan a keda habri manera un invitacion oficial pa tur criminal, contrabanda, droga, arma y hende ilegal drenta facilmente den nos pais! Un ex-minister di Husticia cu a laga nos fronteranan habri pa criminalidad florece na Aruba.


            Ki contrast entre Dowers compara cu e minister di Husticia y Asunto Social actual sr. Rocco Tjon, cu ta cumprando radarnan nobo pa garantisa e bienestar y siguridad nacional di nos pais! Pabien pa tur departamento hudicial cu a ta haciendo un tremendo trabao protehando nos fronteranan!