Quanten y Eagle LNG como proyectonan di Gobierno

The content originally appeared on: Diario

Presidente Biden a presenta e carta pa cual DIARIO a adverti — *Ursell Arends como Vice Prome Ministro enfrente Eagle LNG — * Minister Arends mester por defende Aruba y proyecto Gobierno


ORANJESTAD(AAN)—E ultimo siman sigur tabata un cadena di suceso importante. Pero un siman tambe cu mester entrega personanan cu kier ta politico y parti di gobernacion, e berdad di loke nan tarea ta encera.

Na momento cu Ursell Arends y su partido na ultimo hora a dicidi di opone e proyecto Eagle LNG, hopi pregunta a bini dilanti.

Pa DIARIO e pregunta mas grandi tabata, con un persona cu ta Vice Prome Ministro di e pais segun e areglo di formacion, no ta na haltura di loke un proyecto di Gobierno ta encera.

Ora Ursell Arends a papia, na momento cu Prome Ministro Evelyn Wever Croes tabata den exterior, el a papia como Vice Prome Ministro di Aruba.

Con por ta posibel cu den e funcion aki, e no tabata na haltura cu Ministro Glenbert Croes lo a firma e acuerdo cu Eagle LNG?

Ta na su lugar pa nos pone aki, cu en berdad mientras Parlamento no a aproba e cambionan den composicion di Ministerionan, ainda energia lo mester ta resorta bou di Ministro Glenbert Croes riba encargo di Prome Ministro Wever-Croes.

Ta di spera cu e asunto di Ministerionan aki mas pronto cu ta posibel ta wordo atende den Parlamento, pero mientrastanto si mester para keto riba e realidad cu Ursell Arends ta reemplasa Prome Ministro Wever-Croes.

Ora Ursell Arends no ta presente of tin problema di salud, ta Ministro Xiomara Maduro ta asumi e responsabilidad.

Ursell Arends a papia como miembro di partido RAIZ riba e proyecto Eagle, cu ta un proyecto di Gobierno? Of el a papia como Ministro Presidente Interino?

Su colega den Parlamento a haci uzo di ausencia di Presidente di Parlamento pa yama un reunion di Parlamento y a demostra cu e conoce loke a wordo palabra den coalicion.

Pa Pueblo situacionnan cu ta surgi hopi bez no ta comprendibel. Pa DIARIO si nan ta asunto serio, cu ta haya mas seriedad ora mira con Presidente Joe Biden di Merca a introduci un areglo den cuadro di e Acuerdo di Clima, cu tanto DIARIO a splica na Pueblo di Aruba.

Presidente Joe Biden a cera porta pa proyectonan nobo di azeta y gas wordo financia cu placa di Merca manera ta un palabracion di cantidad di pais na e Conferencia di Clima.

Awe DIARIO ta dedica atencion con Hulanda ta bandona petroleo y gas y con e instalacionnan di Aruba pa atende cu gas na WEB, ta haci posibel di pasa di gas pa hidrogeno.

E pregunta ta si como Vice Prome Ministro, Ursell Arends no ta na haltura di e sumanan cu Aruba mester pa enbes di gas introduci “waterstof” imediatamente. E no ta na haltura di e planificacion cu awe Hulanda ta atende manera DIARIO ta proba y e tempo cu e ta tuma?

DIARIO ta habri e siman aki cu preocupacion grandi. Con por ta posibel cu un persona cu a acepta e encarga di Vice Prome Ministro no ta na haltura di e proyectonan cu e persona cu ta Prome Ministro a atrae pa e pais y awor ta den man di un Ministro?

Con por ta cu Ministronan Arends y Wever no a pone nan mes na haltura di proyectonan cu mester wordo discuti den Conseho di Ministro di cual nan ta forma parti? Nan no a puntra?

Con e proyectonan ta mishi cu nan ministerio? Aunke cada Ministro ta riba su mes, tin asuntonan cu ta mishi cu otro.

Un siman nobo no a habri cu Aruba e trankilidad cu e mester den un situacion mundial dificil.

E ta habri Aruba cu un crisis, cu ta sorprendente pa tur cu ta na haltura con un gobierno ta funciona.

Un pregunta: Ursell Arends a fungi como Ministro Presidente den ausencia di Prome Ministro Wever-Croes? Si of no?