Proyecto refineria por yuda Aruba cu solucion Serlimar

The content originally appeared on: Diario

Grupo di inversionista pionero cu compromiso pa cambio di clima — *Experto Mericano den asuntonan oficial di clima ta cu Quanten —  *Cambio di Clima por uni cu sector petrolero den un proyecto BOO


ORANJESTAD (AAN) — Na December 2021 lo cumpli un aña cu mundo a cera conoci cu e plannan di e consortium Quanten pa establece un refineria ultra moderno na Aruba.

Na un momento crucial den e pandemia, bista di mayoria tabata fiha riba e probecho financiero y economico di Aruba si e proyecto bira realidad.

DIARIO for di momento cu a bira conoci cu Quanten a expresa su interes pa realisa un proyecto di 3.5 Biyon na Aruba, a sigui tur informacion riba e tereno.

Por bisa cu, diferente cu tabata e caso den pasado cu atraccion di refineria, Gobierno Evelyn Wever-Croes no ta duna publicidad na negociacionnan cu ta continua cy tanto e compania di gas Eagle LNG como cu e proyecto di Quanten.

DIARIO a sigui vigila e plannan cu awe segun informantenan internacional ta mas interesante cu nunca, debi na e hecho cu proyectonan petrolero sigur tabata parti di e conferencia di cambio di clima na Glasgow Inglatera.

Con e proyecto pa Aruba ta bay posiciona su mes den e situacion actual, tabata e pregunta cu DIARIO a sigui carga y cu finalmente nos a discuti cu nos informantenan hopi yega na mundo economico y financiero internacional.

Manera a wordo splica na DIARIO, na Maart 2021 Quanten a cuminsa cu ehecucion di e proyecto di un refineria na Angola.

For di inicio DIARIO a wordo informa cu Quanten tabata interesa den un proyecto di refineria na Africa y uno den e region caminda Aruba tambe ta situa.

E compania tin respaldo di Gobierno Mericano no solamente a base di exigencianan oficial, pero tambe a base di personanan cu ta sostene e compania pero tin coneccion directo cu Gobierno di Merca pa hustamente cambio di clima.

“Ora papia di un proyecto refineria cu actualmente Quanten ta negocia cu Aruba, no mester pensa den direccion di loke a keda atras na Lago,” a wordo bisa na DIARIO.

E inversion di 3.5 Biyon di e grupo reuni den e consortium Quanten, lo deshaci di loke tin ainda riba tereno di e refineria pa a base di e formula “Build, Own and Operate” bini cu un concepto nobo di refineria, cu mester tin sosten di personanan manera Professor Daniel Kammen, ganador di Premio Nobel cu ta traha cu Gobierno Mericano riba asuntonan di cambio di clima na forma directo.

Tanto Professor Kammen Harrison Fraker ta sostene e produccion limpi di energia limpi.

Mientras e proyecto di gas ta birando realidad na Aruba den tur silencio, informantenan di DIARIO den exterior, cu DIARIO a acerca tambe pa informacion riba e problemanan di Serlimar, a bisa DIARIO cu Quanten lo por duna asistencia tambe den e maneho di awa y materia sushi.

Informacionnan cu a wordo duna na DIARIO ta indica, cu professor Harrison Fraker ta un experto riba e tereno di produccion di energia for di sushi.

“Tras di grupo Quanten tin pioneronan riba e tereno di produccion di energia limpi. Nan conocemento ta wordo uza dor di Gobierno Mericano cu tambe ta parti di e Conferencia di Clima na Glasgow,” a wordo indica.

Manera informantenan a indica, for di momento cu Quanten a papia di e sistema BOO pa introduci e proyecto, tabata mas cu cla cu nan ta bay “Build, Own and Operate” pues construi un propiedad cu nan ta opera, un refineria na Aruba.

DIARIO ta ricibi informacionnan sumamente interesante di e grupo Quanten cu realmente por haci cu na Aruba cambio di clima y refineria ta uni den produccion di energia limpi.

Interesante ta keda e posibilidadnan cu a wordo trece dilanti pa hasta soluciona e situacion di Serlimar, den cual DIARIO ta sigui profundisa.