Proyecto refineria Aruba ta basa riba vision pa futuro

The content originally appeared on: Diario

Aumento di prijs di petroleo ta confronta miedo mundial pa inflacion —  *DIARIO ta continua cu su investigacion internacional riba  combustibel  —  *Di olanan den prijsnan petrolero pa e futuro di companianan petrolero


ORANJESTAD (AAN) — Investigacionnan cu DIARIO ta realisa riba e situacion internacional y local relaciona cu e prijs di petroleo, no por limita su mes na e aumento of reduccion di prijs di gasolin na e momentonan aki.

Mester tene consideracion cu un cantidad di elemento y factor cu tin relacion directo riba petroleo, cu ta domina tur loke tin relacion cu e calidad di bida, cu hende a costumbra.

Por papia na e momentonan aki di un conflicto directo entre dos factor, cu ta wordo representa actualmente directamente pa e conferencia di Cambio di Clima na Inglatera, caminda mundo ta atende cu peliger grandi cu calentamento di tera por provoca pa planera tera.

Den e cambio di clima e uzo di petroleo como combustibel.

E cambio di clima ta atende cu salud y bida di hende y futuro di planeta tera. Petroleo ta dicidi na e momentonan aki directamente pa e calidad di bida cu hende ta hiba y hasta e bida directo di hende riba corto plazo.

Dos interes importante ta cruza den otro na mundo, cu pa basta tempo ta traha riba solucion di dos materia sumamente importante y den cual e forma rapido cu e camnio di clima ta presenta su mes, ta exigi hende pa traha na forma concreto riba loke pa demasiado tempo tabata na discusion.

E pregunta awor ta, con hende ta pasa den loke por yama un fase transitorio pa bandona e mundo den cual produccion y hasta existencia humano ta mara directamente na petroleo.

Azeta y productornan petrolero ta presente cada momento den bida di hende, cu mester bay mira auto electrico como su forma di transportacion mas discuti na e momentonan aki den un mundo cu ta depende di azeta pa avionnan bula, barconan nabega, produccion mundial tuma local, placa drenta den casnan di famia, produccion di coriente pa tin luz y hasta awa y alimento.

Esaki ta nifica cu e aumento di prijs di coriente tin un impacto tremendo riba hende sigur na momento cu ya Covid-19 a causa hopi problema pa mundo.

Pero con real e ansha di aumento di prijs di coriente ta?

DIARIO a haci un inventario di prijs di coriente y awe ta presenta na su lectornan e prijsnan for di 2011, cu ta prueba cu na e momentonan aki e prijs mundial di petroleo no hopi tempo pasa, tabata na e nivel actual.

Si bay poco mas atras den tempo, por mira cu e prijs riba 100 Dollar pa baril, tabata presente prome cu 2011.

Hende a costumbra cu e prijsnan mas abou y e aumento actual a pone mundo na careda.

Mientrastanto mundo ya den shock di clima, ta busca un salida no solamente riba tereno di medio ambiente pa no ta depende tanto di petroleo, cu ta uno di e fuentenan di entrada mas importante na mundo na forma directo of indirecto.

Aruba tambe ta den suspenso relaciona cu e proyecto di Quanten, cu na 2020 a bati na porta di Aruba y ta den negociacion cu Aruba.

Tabata dificil pa na Aruba mes haya informacion tocante e negociacionnan andando entre Aruba y Quanten.

Informantenan den exterior a mustra cu ora ta papia di Quanten mester papia di un refineria, cu ta cay den cuadro di e proyectonan moderno cu tin como obhetivo pa evita cu produccion di nan productonan ta bira peligroso pa hende y clima.

Informacionnan cu DIARIO tin entre otro di companianan manera Exxon, ta mustra con ta baha e porcentahe di gas peligroso cu ta ocasiona e cambio di clima y ta peligroso pa hende.

Segun informacion ora papia di Quanten y cientificonan su tras, sigur no mester mira e refineria actual na Aruba

Pa 2025 ya e companianan cu ta yama nan mes “Eco friendly” pasobra nan ta evita problema pa medio ambiente, tin metanan fiho.

Pa loke ta trata Quanten mes, DIARIO por comprende cu e refineria di Quanten existente Soya na Angola ta sigui cu e reglanan pa medio ambiente, pero tambe cu Quanten ainda ta interesa den Aruba.

E hecho cu e Conferencia Mundial di Clima a topa cu e aumento di prijs di crudo dor di OPEC, a haci cu hasta marcanan renombra di auto manera Volvo y Ford a cuminsa splica con nan ta bay produci vehiculonan sin peligro pa medio ambiente.

DIARIO lo sigui informa Aruba di tur detaye den e desaroyonan complexo y sigur ta en espera di mas informacion for di California, Merca, cu ta conoci sigur cerca DIARIO pa su lucha riba asuntonan manera cambio di clima y otro ideanan cu mundo en general ta considera “progresista”.