Proyecto Green Corridor ta canando hopi bon y ta bay ta full cla na Augustus 2017

admin

Proyecto Green Corridor ta canando hopi bon y ta bay ta full cla na Augustus 2017ORANJESTAD   (AAN): Diabierna mainta na D.O.W a tuma lugar un conferencia di prensa, relaciona cu e ultimo desaroyonan pa loke ta e proyecto di Green Corridor.

Project manager di e proyecto Green Corridor Jossy Kock di D.O.W durante e conferencia di prensa a splica cu actualmente nan ta bezig cu e partinan principal di e brug chikito na Mahuma.

Den e proximo simannan nan ta bay lanta esakinan, pa sigui cu construccion di e brug chikito.

“Ta asina tambe cu e banda robez di e rotonde di Mahuma ta clay dentro di dos siman nos ta bay cuminza habri esaki, pa cera banda pa Zuid”.

“E ora ey construccion di e rotonde y Mahuma por wordo completa”.

Esaki segun Kock, kende a sigui bisa cu na mes momento e rotonde di Sero Teishi lo wordo habri, pa asina por acapara e trafico u ta biniendo for di Parkietenbos riba e parti nobo di caminda.

E chofernan tin cu bay tene cuenta cu e desvionan di trafico cu ta bay tuma lugar entre sero Teishi y Mahuma.

Kock a indica cu esey ta nifica cu e trafico ta bay circula riba e parti nobo cu tin poni actualmente y e parti bieu lo wordo cera pa asina e contratista tin chens di traha riba e parti bieu.

Mas pariba tin construccion riba e rotonde di Kibaima y eynan e contratista ta banda di pa Noord y ora cu ta asina leu cu e ta cla, e ora ey lo bay cambia pa bay banda pa Zuid.

Kock a sigui bisa cu e arc di e brug a wordo forma.

Diadomingo a keda cla cu e parti di e arc cu ta parti pa Zuid, mientras cu Diaranzon cu a pasa a keda cla cu e di dos parti di e arc.

Aworaki e brug ta completamente forma y nan ta bay cuminza cu e trabao di desmantelacion di e structura temporal, pa asina nan por sigui pa por caba cu e brug.

“Si tur cos bay bon, e brug lo mester por keda casi completamente cla pa fin di Maart”.

Esaki segun e project manager, kende a sigui bisa cu bayendo mas pariba nan ta bezig cu ponemento di asfalt riba tur e camindanan patras.

Tin algun caminda unda cu nan ta bezig ainda cu e parti di fundeshi, pero nan lo purba keda cla cu tur cos pa fin di aña, pa trece menos molester den e parti di dianan di fiesta.

Riba e parti principal na Pos Chikito tambe nan ta bezig cu e asfalt banda di pa Noord di e asina yama ‘service road’ cu ta bin.

“Si bo bay mas pariba nan ta bezig cu tur e aceranan, di Savaneta bay te Bernhardstraat”.

“Tambe bo tin e parti di Weg Fontein y Weg Sero Blanco, unda cu nan ta bezig cu e structura di caminda, unda cu tur cos cu mester wordo drecha ta bay wordo drecha”.

Esaki segun Kock, kende a indica tambe cu banda di pa Zuid nan ta bezig preparando pa cuminza cu renovacion di parti di e caminda di Pieterboerstraat cu ta conecta cu Zeewijk, bay te ex Pepsi Cola Plant cu ta conecta bek cu Bernhardstraat.

Pa loke ta full e proyecto di Green Corridor, e plan ta pa tur cos keda cla pa Augustus 2017.

Next Post

Inicio di Fly Wheel ta djis un parti di 270 miyon sosteni pa nuebe banco local rumbo pa un isla totalmente sostenible

ORANJESTAD(AAN): Diabierna atardi na WEB Aruba NV tabata tin un ocasion caminda a lanza e proyecto di Fly Wheel. Durante e ocasion aki Luis Oduber CEO di WEB Aruba NV a hiba palabra. El a splica cu ta un ground breaking oficial. E Fly Wheel ta forma parti di un […]