Proyecto di Agricultura na 13 scol basico a cuminsa

The content originally appeared on: Diario

Minister Ursell Arends:

ORANJESTAD (AAN):  Ministerio di Naturalesa ta orguyoso di por inicia e proyecto di agroforesteria sintropico na scolnan basico. Na 13 scol rond di Aruba lo instala un hardin di alimentacion unda cu muchanan di eerste te cu zesde lo siña planta, cuida y cosecha diferente tipo di matanan. 

            E proyecto aki, cu ta un esfuerso entre Santa Rosa, Living Soil Aruba y Ministerio di Naturalesa, lo cuminsa diasabra 20 di januari na Scol Basico Washington 7’or di mainta te cu 1’or di merdia. Cada scol lo haya un workshop for di Living Soil prome, mientras cu Santa Rosa ta prepara e espacio, ekipo y material di antemano. Ora cu esaki nan ta cla lo planta diferente mata di berdura y fruta cu ayudo di e scolnan y boluntarionan. 

            E meta di e proyecto aki ta pa brinda nos hobennan herment cu lo yuda nan den futuro y na su turno fortalece nos sector primario. Muchanan lo siña tocante di alimentacion y agricultura sostenibel. Tambe e hecho cu nan lo ta educando nan mes pafo di klas haciendo uzo di nan mannan cual ta algo sumamente balioso pa nan desaroyo. 

            Nos hobennan ta e futuro di nos isla cual ta un factor cu Ministerio di Naturalesa ta enfoca ariba dje. Pues un bon educacion pa nos hobennan den e area agricola lo sa di yuda nos isla desaroya un pilar economico adicional.

            Minister Arends ta haci un yamado na pueblo di Aruba pa duna nan aporte. Un y tur ta bon bini pa yuda e scolnan traha nan hardin di alimentacion. Cu apoyo di nos comunidad nos por brinda nos muchanan un bunita proyecto cu lo sa di brinda nan oportunidadnan den futuro.