Protesta di Mike Eman tabata pa bruha tera y manipula pueblo haciendo mal uzo di su posicion como parlamentario

The content originally appeared on: Diario

Parlamentario Ricky Hoek:

ORANJESTAD (AAN): Diamars dia 13 di september ultimo, Parlamento di Aruba a celebra su apertura di Aña Parlamentario 2022 – 2023. Un ceremonia solemne caminda Gobernador di Aruba a hiba un discuro elocuente na e Presidente di Parlamento, Honorabel Miembronan di Parlamento, Ministernan, ex-Presidentenan di Parlamento, ex-Gobernadornan di Aruba, invitadonan di instituto y instancianan prominente den nos comunidad.

            Señor Gobernador den e parti final di su discurso a reitera cu union, solidaridad y respet ta clave pa un recuperacion genuino. Union pa un causa nacional. Respet pa e dignidad humano. Solidaridad pa esun cu mas mester di dje. Esakinan alabes ta forma e fundamento di e estado di derecho cu nos pais ta.  

            Despues di e ceremonia oficial aki tur parlamentario tabata tin e oportunidad pa hiba algun palabra cu prensa. Sinembargo, ta na e momento aki cu Mike Eman a haya e inspiracion a la Donald Trump, instruyendo y guiando un grupo di 9 señora pensionado, cu ta activistanan di e partido berde, pa drenta den e sala di Parlamento cu panfleta y usando lenguahe inadecuado pa e ocasion y e sala di Parlamento di Aruba. Na e momento ey tur invitado y dignitario tabata presente den sala y edificio di Parlamento. Hasta Gobernador di Aruba tambe tabata den edificio di Parlamento ainda. Mas mahos y denigrante ainda ta momento cu prome cu e ceremonia, e pensionadonan tabata insulta tur parlamentario di coalicion na momento cu nan mester a drenta edificio di Parlamento di Aruba.

            Nunca antes den e 37 añanan di Parlamento di Aruba, algo semehante a sosode. Causando asina  un falta di respet y peliger na cada persona den e sala di Parlamento di Aruba. Señor Eman cu tin añanan den politica di Aruba, cu a asumi e posicion di prome minister y su posicion actual como miembro di parlamento sa mihor cu tur otro hende cu un acto asina no ta permitibel pa laga personanan drenta den sala di parlamento, mucho menos pa haci protesta. Tur persona tin derecho di protesta, pero bo mester sa ta na unda bo mester protesta. Publico por drenta den e tribuna di Parlamento di Aruba, pero no den e sala caminda e parlamentarionan ta sinta, cu ta e instrumento di nan trabou.

            Pero netamente e sensacionalismo aki, di hendenan fanatico y sumiso na Mike Eman, ta duna e parlamentario aki e satisfaccion y creencia cu e por haci mescos cu otro politiconan di taya mundial, den e caso aki Donald Trump, pa instrui y manipula hende pa haci e trabou sushi p’e y pa e por ta e heroe memey di nan y asina gosa di un elogio fabrica.

            Lamentablemente, contrario na Donald Trump, Mike Eman no por wordo declara ‘guilty of treason’ (culpable di traicion), pa e acto cu e la comete den sala di Parlamento di Aruba. Pero si por bisa cu e a fomenta violencia politico y esaki no ta hustificabel den un democracia.

            E protesta no tabata zomaar un reaccion di algun pensionado – e tabata e plan di Mike Eman pa bruha tera y manipula pueblo haciendo mal uzo di su posicion como parlamentario.