Prome Minister a ricibi e prome grupo di studiante na Schiphol

The content originally appeared on: Diario

ORANJESTAD (AAN) – Manera ta conoci, e siman aki e grupo di 180 studiante cu a haci uzo di Arubalening a biaha pa Hulanda pa continua cu nan estudio. Un grupo a biaha 1 di augustus y e otro 2 di augustus.

            Prome Minister Evelyn Wever – Croes hunto cu Minister Plenipotenciario Interino Ady Thijsen tabata na Schiphol pa ricibi e prome grupo di studiante cu a yega Hulanda pa continua cu nan estudio.

            Prome Minister Wever – Croes a bisa cu e studiantenan a yega bon y  a wordo ricibi pa e mentornan di cada ciudad y tambe pa e comisionnan “opvangcommissies” di cada ciudad. “Ta bunita pa mira cu studiantenan cu ya ta na Hulanda pa un tempo, ta duna di nan tempo y esfuerso pa por ricibi e studiantenan nobo. Mi ta gradici cada un di boso pa esaki.”

            Na e ocasion Prome Minister tabatin e oportunidad pa saluda y combersa cu e studiantenan y desea nan hopi exito. “Mayornan por ta trankil, e yiunan a yega bon y aworaki tur ta na caminda pa nan ciudadnan y cu poder di Dios tur cos ta bay bon cu nan cu nan estudio, nan cas y nan bida na Hulanda,” Premier Wever – Croes a expresa.