Prome cu AZV nace ya rapport a adverti pa peliger financiero

The content originally appeared on: Diario

Prome Ministro Evelyn Wever-Croes a pronuncia e gran berdad — “Kost voor baat” tabata e conseho oficial prome cu AZV a nace  —  *Gobierno Henny Eman a wordo adverti pa e peso di e seguro AZV


ORANJESTAD (AAN) — Prome cu AZV a nace, expertonan a mustra Gobierno Henny Eman riba e riesgonan grandi cu ta wordo tuma cu introduccion di un seguro contra gastonan pa enfermedad.

“Kost voor baat” (Gasto prome cu Probecho) tabata e palabranan cu a bini dilanti den e consehonan oficial den cual expertonan a mustra riba e peligro grandi cu e introduccion di AZV lo tabata tin pa e pais riba tereno financiero.

Den e consehonan cu a bay pa Gobierno a expresa preocupacion grandi den e rapport cu el a emiti den cual el a uza cifranan di e expertonan financiero di “Cooper & Lybrand” cu mester a bati alarma grandi.

E peso di cuido medico durante 1991 pa 1995 tabata indica cu Hospital so lo exigi 47 porciento di e total di gastonan cu AZV lo mester a cubri y cu 20 porciento di e placa cu lo tabata drenta, mester a bay pa remedi.

E placa na dobel forma mester a bini di Pueblo, cu obligatoriamente mester a uni na e seguro contra enfermedad cu mester a reemplasa tur seguro contra enfermedad cu na e momento Aruba tabata conoce.

Gobierno cu placa di belasting di Pueblo mester a duna su parti mientras Pueblo mester a paga prima pa un seguro cu hamas mester tabata den man di Gobierno.

Na e momentonan cu tabata prepara pa pasa AZV prome cu eleccion 2001, Gobierno Henny Eman a wordo adverti pa e aumento tremendo di gastonan den cuido medico.

DIARIO ta uza documento pa e por informa Pueblo y cifra no por practica mentira.

E gastonan pa cuido medico lo a subi di casi 86.8 Miyon pa 153 Miyon teniendo cuenta cu varios aspecto.

No mester a tene na consideracion solamente loke lo a wordo cobra, pero tambe un poblacion cu tabata crece.

E expertonan a mustra riba tur loke ta conta den loke lo a bira gasto di AZV y cu mester a pone na duda serio, si Gobierno lo por a sigui cubri.

Cu awe Prome Ministro Wever-Croes tin razon di papia di gasto cu hamas Aruba mester a asumi como su responsabilidad, no ta wordo afirma solamente pa e realidad di awe.

Den rapport oficial di Conseho Social Economico di 2014 a mustra riba responsabilidad cu Gobierno a pone riba su lomba y cu no mester wordo carga pa Gobierno.

Awe politica ta wordo hunga cu un realidad cu tur hende conoce. Politiconan ta busca probecho for di un situacion serio cu a presenta pa Pueblo.

Cu ta papia di “eigen risico” cu ta aporte di pueblo mes, no ta nada asombroso pasobra rapportnan prome cu AZV a nace pa haci politica, ya tabata papia di “eigen risico” cu no ta nada desconoci den mundo di seguro y sigur di enfermedad.

DIARIO tin documentonan den estudio y lo entrega Pueblo prueba pa e por comprende e weganan politico cu a wordo hunga.

Prome Ministro Wever-Croes ta duna prueba di honestidad ora e papia di gastonan cu Aruba no por carga mas ainda si tene cuenta cu ta cu placa di Pueblo mester yuda tur cu no tin entrada.

AZV tabata un abuso politico di Gobierno Henny Eman cu tabata na haltura di e riesgo cu el a crea y cu awe ta rementa den problema serio pa cuido medico pa Aruba!