Prome biaha ICAO ta manda un “All Women’s Team” riba un mision

The content originally appeared on: Diario

ICAO ta asisti Aruba cu un team di expertonan cu ta marcando historia

ORANJESTAD (AAN); For di tempo cu aviacion a cuminza na mundo, hende muhe tabata involucra den desaroyo di avion, helicopter y tambe biahenan espacial. Hende muhe den aviacion ta un causa cu ya for di aña 1907 ta den desaroyo. Y aunke cu tabata tin restriccionnan unda nan solamente tabata permiti pa fungi den un rol di apoyo den e industria, p.e. stewardess (flight attendant), esaki no a stop pa persigui careranan den e sector di aviacion.

   Na aña 1970, participacion di hende muhe den e sector di aviacion a mira un aumento drastico desde segunda guerra mundial pero e porcentahe global di hende muhe den aviacion ainda ta hopi abou, cual ta aproximadamente  3 porciento.

   Esfuersonan pa hisa e participacion di e ser femenino den tur area di aviacion ta un di e metanan cu ICAO (Organizacion Internacional di Aviacion Civil) ta trahando pe y den e ultimo siman, Aruba tabata tin e honor di ta e prome Pais cu ICAO ta manda un “All Women’s Team” di expertonan pa un mision.

   Tambe tin cu duna palabra di elogio na nos profesionalnan femenino cu ta forma parti di e team di inspectornan, beleidsmedewerkers, y otro expertonan di Directie Luchtvaart Aruba y cu ta kibrando stigmanan(breaking barriers) encuanto hende muhe nan funcion, den e sector di aviacion aki na Aruba. Ta gradici tur e profesionalnan femenino aki pa tur e contribucion remarcabel y nan compromiso continuo pa eleva e nivel di aviacion aki na Aruba. Esaki sigur ta un logro remarcabel pa loke ta trata igualdad, diversidad y inclusion di genero. Un causa cu Gobierno di Aruba ta para firmemente p’e.

   “E ta un honor pa Aruba por ta parti di e historia aki den aviacion, y ta actua como curashamento pa nos hendenan y sigur e futuro generacion cu ta soña di drenta e sector di aviacion”, minister di transporte, Sr. Ursell Arends ta remarca.