Progreso di Aruba no mester afecta alerta situacion mundial!

The content originally appeared on: Diario

Mundo ta observa detencion acusado di complot pa mata Maduro


Economia mundial lo por subi cu 3.1 porciento na 2024 segun IMF
Omtzigt a uza auto di Plasterk pa bay pone fin na ilusion di formacion 

ORANJESTAD (AAN) Cu un tremendo celebracion di Carnaval, Aruba a cera e temporada di Carnaval 2024, cu a entrega na mundo e prueba, cu Aruba ta un regalo precioso como destinacion turistico.

   E realidad di Aruba, sinembargo, no por wordo comparti na un parti grandi di mundo ni na e pais mas grandi di Reino Hulandes, cu ta Hulanda y cu ainda no por a logra forma un Gobierno nobo.

   Esaki ta uno di e motibonan cu mester adverti, cu subiendo e caminda di normalidad di Aruba, no por permiti progreso di Aruba, afecta e estado di alerta cu mester mantene pa desaroyonan den Reino y riba tereno internacional.

Pa keda un rato den seno di Reino Hulandes, te awor Aruba no por ta sigur, con den e futuro mas cercano, contenido lo wordo duna na e relacionnan den Reino.

E maneho Hulandes a keda den man di e Gobierno demisionario di Mark Rutte, kende lo no bolbe como gobernante Hulandes pero si lo por soprende den posicion cu e lo por ocupa den e futuro mas cercano.

   Un Gobierno pa Hulanda y asina un Conseho di Ministro di Reino cu ta inclui Aruba, te ainda no a mira luz.

   E momento a yega ayera pa Ronald Plasterk a entrega su encargo di Informador, pero prome cu esaki a bira un hecho, Aruba ta haya otro prueba, cu den seno politico Hulandes tambe tin momento cu hende ta puntra nan mes, kico ta of no ta nivel politico.

   Den tur e informacionnan asina importante pa Reino tocante formacion di un Gobierno, a bira importante pa wordo menciona cual politico stima otro y cual tin problema pa biba den cercania di e otro.

   Uno di e informenan mas interesante tabata, cu Pieter Omtzigt, cu mester a bira futuro heroe politico di Hulanda, lo a pidi Ronald Plasterk pa e haci uzo di e auto cu Plasterk tabata tin na su disposicion.

  Omtzigt a haci uso di e auto aki, pa bay reuni cu periodistanan na un hotel, caminda el a anuncia cu e ta bandona e intentonan di formacion.

   Uno di e hopi informacionnan sumamente valioso cu a mira luz den e formacion di un Gobierno Hulandes, cu ainda no por wordo concretiza.

   En todo caso, Ronald Plasterk a entrega su encargo aunke el a bisa cu tin chens pa forma un Gobierno.

   Kim Putters ta Presidente di e Sociaal Economische Raad y awor informador nobo pa Hulanda yega na un Gobierno, cu hopi hende ainda no ta mira con e lo wordo realisa.

  Geert Wilders, e ganador absoluto di eleccion cu a sigui subi den popularidad y te ainda ta na un distancia for di tur otro, no ta mira pakico no por forma un Gobierno.

   Hasta por bini un gobierno extra parlamentario, cu sosten di posiblemente hasta Omtzigt, pero con e lo funciona, no ta wordo bisa.

   Hecho ta cu Hulanda no tin placa y cualkier Gobierno cu sinta riba stul di Gobernacion, lo mester tuma medida.

   Guera na Medio Oriente a continua y ta sigui crea menasa pa comercio, loke ta parti di e informacionnan riba cual e proyeccionnan di IMF pa economia mundial ta basa su mes pa papia di un crecemento economico mundial di 3.1 porciento na 2024, cu ta un aumento cu 0.2 porciento compara cu e cifranan anterior.

   Guera na Ukraine tambe ta continua y Union Europeo lo sigui duna asistencia financiero, manera a wordo anuncia.

   Ora papia di guera, pa Aruba ta sumamente importante bolbe na Venezuela, caminda segun Nicolas Maduro tin intentonan pa mata su persona.

E ta papia di un organisacion subversivo cu el a cualifica como “armband blanco”. Esaki ta e motibo pa a detene un activista Rocio San Miguel, di nacionalidad combina Venezolano y Spaño.

   Kico lo pasa cu e activista ta desconoci, pero awor Merca a adverti cu Presidente Biden lo cumpli cu su menaza pa bolbe introduci medida contra Venezuela, si algo pasa cu e activista.

   Segun tur informacion e situacion na Venezuela ta sumamente tenso y Aruba mester tene esaki na bista mientras por spera mas desaroyo na caminda pa eleccionnan cu mester tuma lugar na pais, cu Nicolas Maduro sigur lo no entrega sin mas segun tur informacion.

   Un mundo di basta suspenso, ta drenta Cuaresma 2024, porta pa un aña cu lo por bira decisivo pa economia mundial.