Prijs di hopi producto a subi barbaramente den supermarket

The content originally appeared on: Diario

Diaranzon cu a pasa, hunto cu gasolin: —-*Pero si prijs di gasolin baha prijs di alimento ta keda halto

ORANJESTAD (AAN) – Diaranzon siman pasa, cu prijs di gasolin a subi formalmente na Aruba, diferente consumidor a keda boca habri ora nan a constata cu e productonan den practicamente tur supermarket tambe a subi, na un forma drastico.

   Un saco di aroz di 5 liber cu prome cu Diaranzon tabata costa 5.60 a subi pa 7.90 florin y azeta dushi tambe a subi cu entre 4 pa 6 florin, mientras ta suppose cu nan ta productonan inclui den e macuto basico. Ni papia mes di prijs di galiña cu diferente consumidor no por a kere con caro el a bira.  Prijs di chicken breast a subi barbaramente.

   Un consumidor a haci e remarca cu diferente biaha ora ta wordo anuncia cu prijs di gasoline ta bay subi, prijsnan ta subi tambe di antemano pero na un forma menos notable, cu loke a sosode Diaranzon cu a pasa. Y tambe ta asina cu ora ta wordo anuncia cu prijs di gasolin lo baha, den ningun supermercado prijs di productonan alimenticio ta baha bek.

   Tin ciudadanonan cu tin entendi, incluso por a mire via Television y Facebook, cu na Curacao mas bien e prijs di gasolin ta baha y nan ta puntra cual ta e diferencia cu ta haci cu na Aruba si, e prijs ta subi asina barbaro y hunto cune tur producto ta subi di golpi den supermercadonan.