Prijs di gasolin y diesel ta bira “Mayday” pa Aruba

The content originally appeared on: Diario

Manera DIARIO a anuncia for di inicio di crisis petrolero 2021 — *Prijs produccion local ta uni na e aumento di gastonan importa — *Proyecto di gas Eagle esencial pa balancea prijs basico na Aruba


ORANJESTAD (AAN) — Na inicio di October, DIARIO a bati alarma grandi pa Aruba, ora paisnan di OPEC a dicidi di aumenta prijs mundial di petroleo na momento cu mundo ainda mester a recupera di Covid-19.

Hunto cu expertonan local y mundial cu ta asisti DIARIO den e informacion di lectornan di DIARIO, advertencia a wordo lansa pa e efectonan cu por spera na Aruba na dos forma.

Na prome lugar Aruba como pais importador di producto, mester a tene cuenta cu e efecto di prijsnan mas halto pa productonan cu ta wordo importa cu prijs mas halto pa produccion y transportacion.

Na mes momento DIARIO a bati alarma pa loke mester a bini ainda cu tabata aumento di prijs di productonan petrolero riba mercado local di Aruba.

Aki ta papia di prijs di gasolin, prijs di diesel y prijs di kerosin cu, manera a wordo anuncia oficialmente ayera, ta subi cu 12,2 cent (Gasolin Unleaded Premium), 15.8 cent (Diesel LS) y 15.7 cent (Kerosin) pa liter.

Pa Aruba e aumentonan aki ta bira causante di un proceso pisa di inflacion, cu lo continua mientras prijsnan mundial di petroleo no stabilisa.

DIARIO a wordo prepara pa expertonan cu Aruba ta acerca “Mayday”, e momento cu desaster ta bira inevitabel y cu hende ta cuminsa sclama “M’aidez”(Bo ta Yudami).

Pa Aruba cu ta depende di importacion por papia di un dobel hit economico. Tur producto cu ta wordo importa a bira mas caro a base di e gastonan mas halto den produccion den exterior y e gastonan pa transportacion mundialmente.

Awor e produccion local, cu ta inclui tur sector economico di e pais y tur loke ta genera entrada na Aruba, ta wordo afecta pa aumento di costo den produccion y den servicionan, loke lo manda prijs di comercio local atrobe halto.

Na e momentonan aki DIARIO hunto cu expertonan ta analisando e impacto fuerte cu por spera di e prijs di gasolin den porcentahenan cu tur sector lo sinti y cu causa un inflacion sumamente pisa pa Aruba, mescos cu pa tur pais di mundo.

DIARIO den curso di e dianan venidero lo sigui informa Aruba di e peso extra cu por spera.

Mientrastanto ta importante pa Aruba pa no perde animo pero pa mira tambe kico por balancea e problema serio cu a surgi y cu ta afecta e placa disponibel pa cada hende y negoshi, tene cabez riba awa.

Gasolin ta combustibel cu hende y negoshi mester pa nan transportacion y transportacion di productonan cu nan ta produci. Ora e prijs subi, prijs ta subi pa tur hende y tur negoshi, cu mester aumenta nan prijs pa por paga nan gasto.

Pa pone e efecto den balansa, otro prijsnan importante mester baha. Otro prijs importante ta awa y coriente cu mester di combustibel pa produccion.

Pa Aruba ta bira esencial pa e proyecto di gas pa WEB di Eagle LNG wordo realisa.

Informantenan clave di DIARIO a indica, cu proyecto ta wordo realisa segun schedule y cu (si nada inespera mundialmente socede) ta percura pa Aruba uza gas na lugar di combustibel petrolero caro pa funcionamento di WEB.

Esaki ta baha prijsnan di utilidad na Aruba ora Eagle LNG bira operativo.

Ayera riba mercado internacional prijs di gas a baha.

Esaki ta nifica cu por crea un balansa pa e prijsnan di gasto cu petroleo ta aumenta actualmente.

E entrada di Eagle, cu ya ta den proceso importante, lo crea trabou pa hende den e diferente categorianan di trabou pero tambe pa comercio y Aruba como pais.

Den e recuperacion di e crisis di Covid-19 cu a wordo sigui pa e crisis di petroleo, Aruba lo por baha prijs di utilidad y asina por ehempel sigui baha prijs local di produccion riba tur tereno incluso e tan importante tereno di agricultura y horticultura.

Dianan di fiesta 2021 lo ta dificil, manera DIARIO pa basta tempo ta splica Aruba pero na e momento cu WEB por switch pa uzo di gas, Aruba por conta un forma cu ta balancea prijs di utilidad y ensancha comercio local.