Presencia di un malesa mortal di bushi raporta pa Aruba

The content originally appeared on: Diario

ORANJESTAD (AAN): Varios sambuyado local a observa bushi (“Long-spined sea urchin”,

Diadema antillarum) morto y muriendo den Aruba su awanan costal, locual ta rekeri e atencion y accion di nos comunidad.

   Segun Tatiana Backer, MSc. ing. (ecologo marino), e observacion- y potretnan comparti ta casi sin duda e malesa misterioso y fatal di bushi cu ta bezig ta sprei rond di Caribe causando mortalidad extenso.

   E mortalidad halto ta afecta mas tanto e bushinan, cu ta un especie indicativo pa e salud di un ecosistema di coral. door di nan importancia ecologico como herbivora (comedo di alga), similar na e gutunan (“parrotfish”), e salud di e especie aki tin implicacionnan pa e sector turistico y pa pesca cu ta depende di nos ecosistemanan costal.

   E malesa ta causa cu e bushi ta perde su spinanan y su teijdonan ta desintegra , locual a worde observa na por lo menos doslugar na Aruba, Tres trapi y Mangel Halto.

   “Mi ta snorkel of sambuya na Tres Trapi casi tur siman, y diripiente di un siman pa otro mi a bin di ripara cu un cantidad grandi di bushi tabata morto y muriendo. No ta ami so a wak esaki, sino otro sambuyadonan tambe a mira esaki den e siman di 25 pa 31 di Juli,” e ecologo marino a bisa.

   “Mi a saca potret di e bushinan cu den algun dia tabata pasando den diferente estadonan; 1) individualnan saludabel pega na e superficienan duru di piedra (imagen 1), 2) individualnan cu a los, yegando den e areanan di santo, unda nan ta saca nan spinanan (imagen 2), 3) individualnan cu mas y mas perdida di spinanan y tejidonan, unda e skelet ta bira visibel (imagen 3), y finalmente 4) nan ta muri, y e restonan ta desintegra mas aún door di pisca y otro animalnan marino (imagen 4).” raporta door di Albi Valdéz, BSc (activista conservacion marino, Divemaster). Albi Valdéz a raporta su observacionnan riba e website di AGRRA, na:

www.bit.ly/bushi-morto

   Mientras cu e observacionnan ta worde revisa, e potretnan y conteonan ta duna un indicacion cu e situacion pa Aruba su bushinan no ta mustra dje bon ei.

   Ta asina, cu pa colmo un censo di e populacion di bushi a worde haci door di Tatiana Backer na cuminsamento di Juli 2022, dus prome cu a raporta e mortalidad. Asina Aruba tin un “baseline” /referencia pa monitorea mortalidad y e recuperacion potencial di e bushinan. E censo ta planea pa worde ripiti pa duna un estimacion di e porcentahe di mortalidad na Tres Trapi y Mangel Halto, cu ta di sumamemente importancia pa planea y maneha conservacion.  

   Urgentemente, sambuyado ta worde pidi pa raporta nan observacionnan y manda potretnan di e bushinan pa AGRRA, cu ta yuda verifica su presenciia y spreimento den nos costanan. Hasta ora no tin bushi morto of muriendo, e informacion por ta hopi valioso pa scientificonan y manehadonan di nos recursonan (DNM y FPNA). Tambe pa evita cu e malesa ta sigui sprei, sambuyadonan mester percura pa haci nan wetsuits y ekipo di sambuyá bon limpi cu awa dushi despues di cada sambuya y evita sambuya di unlugar unda tin indicacion di malesa (“sitio contamina”) pa un “sitio limpi”. Pa ultimo, mester evita pa mishi of move bushinan bibo, morto of muriendo.