Premier Wever Croes na spera cu sindicatonan nombra nan delegadonan pa reuni riba tema indexering

The content originally appeared on: Diario

Pa trata conhuntamente e tema di indexering:

ORANJESTAD (AAN)—Minister Presidente, Evelyn Wever Croes, den un entrevista cu DIARIO a elabora tocante un reunion cu tin pendiente cu Sindicatonan y e tema cu mester trata cu nan, cu ta indexering.

E dignatario a confirma cu el a haya un carta di e sindicatonan, cu segun e ta corda ta di September pa October ultimo, den cual nan ta pidi atencion tocante e tema di indexering.

A reuni den seno di gobierno cu Departamento di Finanzas y Departamento di Recurso Humano (DRH) pa pidi nan conseho y a base di esaki bay na mesa cu sindicatonan.

“Mi a manda nan un carta prome cu mi a biaha pa Hulanda, e di tres siman di October, unda cu mi a bisa cu mi kier reuni cu nan riba e tema di indexering. Eigenlijk na 2019 nos a cuminza papia di e tema, y mi a bisa nan cu mi no ta haya na su lugar cu sindicato cada tanto tempo tin cu protesta pa yega na un indexering; mi lo kier yega cu nan na un acuerdo pa termino largo”, Minister Presidente a señala.

E dignatario a expresa cu ya caba nan sa cu si tin inflacion por haci tal cos y si no tin, por haci tal cos, kiermen e no mester ta un issue cada biaha.

“Anto pa haci esey, mi a propone pa bay den un Comision mas chikito, tecnico, unda cu tin e sindicatonan y nos expertonan di finanzas y recurso humano, pa hunto nos bin cu un proposicion con  ta bay atende cu indexering. Tambe tin e aspecto di gelijkbedrag cu e toelagenan cu ta wordo duna, cu tabata e Inhaalmanoeuvre cu, eigenlijk, ta finalizando e aña aki. Kiermen, ta tempo pa nos yega na un acuerdo cu nos por sigui padilanti”, Minister Presidente a agrega.

E dignatario a agrega cu e Decreto Ministerial cu el a traha a wordo a wordo firma na December 2019, mientras cu COVID a dal Aruba trempan na 2020, y gobierno no a sigui traha riba dje.

“Anto mi a manda nan e MB (Ministeriele Beschikking) atrobe, pues e decreto, anto mi a bisa nan cu mi kier update esey den e prome reunion, pa nos papia di esey, y nan bisa mi ken ta e representantenan cu nan a delega, y mi ta ainda pendiente di e nombernan. Mi no a haya nan ainda, pa nos sinta na mesa anto delinea con nos ta nay atende cu esaki”, Premier Evelyn Wever-Croes a señala.

E mandatario a splica cu no necesariamente mester manda delegadonan di seno sindical, pero podise cu nan manda un experto di nan confianza, cu por papia den liñanan grandi, kico ta e miho manera pa sigui cu e tema di indexering, pa a base di esey nan wak den pasado con nan tin cu atende cu e tema.