Premier lo acepta presidencia di OCTA pa 2024

The content originally appeared on: Diario

ORANJESTAD (AAN): Prome Minister Evelyn Wever-Croes ta na Bruselas pa atende un conferencia di ‘Overseas Countries and Territories Association (OCTA) cu ta tuma luga dia 26 pa 29 di februari 2024.

Aruba lo ta presente cu un delegacion cu ta consisti di Prome Minister, Minister Geoffrey Wever, Director di Departamento di Asuntonan Economico, señora Maria Dijkhoff-Pita y tambe Minister Plenipotenciario di Aruba na Den Haag, señor Ady Thijsen.

   OCTA ta un asociacion di paisnan ‘overseas’-otro banda di lama, di Union Europeo cu ta consisti di paisnan den Union Europeo y esnan pafo. E asociacion ta consisti di 13 miembro. Miembronan cu ta pertenece na e parti Hulandes, Aruba, Bonaire, Curaçao, Saba, St. Maarten y St. Eustatius. Miembronan di islanan Frances, French Polynesia, Caledonia, St. Barts, Saint-Pierre-and-Miquelon, French Southern and Antarctic lands (TAAF), y Wallis and Futuna. Y miembro di Dinamarca, Groenland.

   Esaki ta un conferencia ministerial cu ta tuma decisionnan pa henter e OCTA. Prome Minister ta bay acepta e presidencia, liderato di OCTA pa e aña nos dilanti. Esaki ta un di e momentonan culminante di e conferencia cu pa e mandatario principal di nos pais, ta un gran honor y orguyo.

   Prome Minister a remarca cu OCTA ta hopi importante pa Aruba. Door di e miembrecia di Aruba na e asociacion aki, Aruba a logra haya fondo di Union Europeo pa logra varios proyecto hopi importante entre otro e facultad nobo, SISSTEM di Universidad di Aruba y Mobi-Bus. Y e siman aki, Prome Minister y Minister di Asuntonan Economico ta na Bruselas pa firma e acuerdo financiero pa e proyecto e-Government cu e suma di 14 miyon Euro di cua 13.5 miyon ta pa ehecucion di e proyecto y 0.5 miyon ta pa maneha e proyecto. Minister Geoffrey Wever lo firma e documento financiero como esun autorisa pa haci esaki.

   “Mi ta hopi orguyoso di tuma e presidencia di OCTA pa e aña nos dilanti y hopi contento tambe cu Aruba ta firma e acuerdo pa ricibi e 14 miyon Euro. Esaki ta hopi importante pa Aruba y cu esaki Gobierno lo sigui lucha pa haya mas fondo di Union Europeo pa yuda Aruba cu mas proyecto”, Prome Minister a duna di conoce.

   Prome Minister despues di su compromiso na Brussel, ta bay Hulanda pa diferente reunion entre otro cu Premier Mark Rutte, Secretario di Estado Alexandra van Huffelen, Minister Rob Jetten, y cu Eerste Kamer y Tweede Kamer. Topico principal di e reunionnan ta riba e tema di e fianza di Covid y con pa baha e interes di 6.9%.