Post Aruba ta celebra su di 130 aniversario cu emision di serie di stampia nobo

The content originally appeared on: Diario

ORANJESTAD (AAN): Pa conmemora e di 130 aniversario di e servicio postal di Aruba riba 1 di augustus 2022,

Post Aruba NV a emiti un souvenir sheet cu 3 stampia y un envelop di Prome Dia di Emision, cu a keda diseña pa Sr. Nigel Matthew.

            E emision unico aki ta representa e transporte di carta y paki durante e ultimo 130 aña pa medio di imagennan di partidonan di carta, vehiculonan di transporte, postbus y envelop.

            E prome actividadnan postal riba e isla tabata consisti di manda y ricibi post (carta, pakete etc…) di botonan cu tabata di origen di Corsou y tin biaha tambe di Venezuela. Garibaldi Cephas Helder tabata ricibi post cu tabata bin cu boto. E anuncio di yegada di post tabata tuma luga den waf di Oranjestad.           Tabata recoge tur post publico na e Oficina di Post auxiliar. E hendenan tabata uza tur medio di transporte pa recoge nan post: cabay, burico, boto, aunke mayoria tabata bin na pia.

            Despues, a cuminsa transporta carta y paki tambe via aire pa medio di avion.

            Actualmente na e yegada di post na e oficina postal, e partidonan di carta ta sortia y distribui e post na e adres indica.

            E envelopnan plama den aire ta simbolisa e diferente direccionnan caminda ta manda carta na tur skina di mundo.

E rand cora, blanco y blauw di envelop, a bira un marca reconocibel pa carta via avion.

E diferente uniform di e partidonan di carta ta indica e diferente periodonan den tempo. E uzo di vehiculo a bay di bicicleta pa auto y scooters.

E postbus comunitario estilo antiguo ta bay bek na inicio di e servicio postal, aunke ainda tin algun na Aruba. E postbus na entrada di casnan a cambia su forma y tamaño durante añanan, pero a keda mantene su funcion y a bira un elemento contemporaneo di e fachada di un cas.

E souvenir vel y Envelop di Prome dia di Emision ta obtenibel na Post Aruba na Oranjestad y San Nicolas, y tambe online riba www.postaruba.com/stampshop