Posicion Aruba determinante pa balansa Statuut y Supervision

The content originally appeared on: Diario

Aruba pais mihor prepara den Reino pa e bom di Raymond Knops — *Wever-Croes cu posicion clave pa contenido relacionnan den Reino — *Decision Reino den conflicto CAFT/Aruba importante pa COHO

ORANJESTAD (AAN) — “Prome Ministro y su Gabinete mester a bay di acuerdo cu CAFT, aunke e lista di exigencianan di CAFT no por wordo cumpli dor di Aruba?”

Esaki ta e topico cu durante ultimo simannan ta central no solamente na Aruba pero na tur pais den Reino, cu mester conclui nan negociacionnan for di tempo di Secretario di Estado Hulandes Raymond Knops.

For di 2017 Raymond Knops tabata e ocupa e posicion aki, cu no tabata nada facil ya cu asistencia financiero pa paisnan den Reino tabata ocupa un lugar importante riba su agenda.

E situacion a bira mucho mas serio ora na 2020 Covid-19 a bati na porta y Aruba dirigi pa Gobierno Evelyn Wever-Croes  mira su plannan pa realisa e presupuesto 2020 cu un saldo faborabel, basha abou.

Mester a traha riba cifranan nobo pa Aruba, mescos cu a pasa na tur pais na mundo incluso Hulanda.

E problema pa Aruba tabata, cu for di 2014 e situacion na Aruba tabata di tal gravedad cu Reino mester a interveni y Aruba a cera conoci cu supervision.

E asistencia den tempo di pandemia a haci cu Aruba mester a cera un acuerdo cu Reino Hulandes, cu a introduci reglanan pa reforma di tur pais Hulandes den Caribe, incluso Aruba.

Asistencia Hulandes ta necesario, pero e exigencianan cu a bini dilanti den COHO tabata di tal magnitud, cu nan ta mishi cu autonomia di e pais y esaki ta haci cu te awor no tin un acuerdo pa nan contenido.

Recientemente e encuentro di e cuatro paisnan den Reino a tuma lugar. Ya Raymond Knops no tabata presente pero e tres paisnan den Caribe mester a atende cu e Secretario di Estado nobo pa Relacionnan den Reino di Hulanda, Alexandra van Huffelen, cu no a duna un bista cla te awor di loke e tabata pensa riba diferente asunto.

Documentonan cu a mira luz y expresionnan cu a wordo haci si a indica cu no por spera mucho cambio den e posicion di van Huffelen enfrente e exigencianan Hulandes.

Manera DIARIO a informa durante e ultimo simannan a base di contactonan directo cu informantenan clave, Augustus 2022 lo bira decisivo.

Mientrastanto CAFT a presenta su posicion riba e presupuesto, e compilacion di cifranan di entrada y gastonan di Aruba y a  presenta exigencianan sumamente pisa pa Gobierno Evelyn Wever-Croes.

Exigencianan cu segun expertonan cu DIARIO a acerca, tambe ta haya su sumamente pisa y cu sigur no por wordo acepta sin mas dor di Gobierno, cu tin un deber democratico cu Pueblo pero tambe a hura cu e lo no hinca Pueblo den problema.

E hecho cu Gobierno di Aruba a mustra CAFT cu e no por bay di acuerdo cu CAFT y haci tur e cambionan cu CAFT kier, a wordo discuti den Reino, caminda Aruba ta hunga un papel sumamente importante.

Tanto Curacao como Sint Maarten a bay di acuerdo pa Aruba bira “trekker” pues carga e loke mester bira COHO a base di e forma cu Gobierno Wever-Croes a presenta concretamente plannan pa esaki durante e encuentronan di Reino recientemente.

E hecho cu Aruba no a bay di acuerdo cu e exigencianan di CAFT, a haci cu proximamente Gobierno Wever-Croes lo mester bay Gobierno di Reino pa entrega prueba cu e tin razon di bay contra e exigencianan di CAFT debi na e resultadonan negativo cu nan lo tin pa Aruba segun pruebanan cu Gobierno Wever-Croes mester presenta.

Informantenan a mustra cu e papel di Aruba na e momentonan aki den Reino a bira sumamente interesante, ya cu aki dos experto riba nan tereno, cu ta Prome Ministro Evelyn Wever-Croes y Ministro Xiomara Maduro mester defende e posicion di Gobierno Wever-Croes enfrente Conseho di Ministro di Reino.

E situacion nobo ta wordo mira como un situacion igual na e momento cu Aruba a enfrenta Reino pa su Status Aparte na 1983 dirigi pa Betico Croes,, a alcansa cambio di e decision pa Independencia na 1996 bou Prome Ministro Nelson Oduber.

Informantenan ta insisti cu e desaroyonan nobo lo bira di mayor importancia pa COHO cu lo nifica relacionnan financiero nobo den Reino Hulandes!