Por mira claramente cu no tin boluntad pa yega na un solucion pa e trahadornan di Post NV

The content originally appeared on: Diario

Secretario General di SEPPA:

ORANJESTAD (AAN) Magaly Brito, Secretario General di Sindicato di Trahadornan Publico y Priva (SEPPA), e trece dilanti den entrevista cu DIARIO, cu semper pa e trahadornan ta un lucha y un bringamento, un accion y un protesta pa por haya atencion. Corda pa yega na un solucion.

   Brito a indica cu biaha pasa gobierno a bisa cu nan ta dispuesto pa yega na un acuerdo con nan por paga nan, y esey a wordo proponi, pero na mesun momento nan a kite for di mesa.

   “Kiermen, eigenlijk bo ta mira cu no tin e boluntad pa yega na un solucion pa e trahadornan aki. Realidad ta cu eynan pa tur trahado y tur hende aki na Aruba, costo di bida ta dal hopi duro, prijsnan di producto y servicio, y gastonan diario pa biba akinan, ta extremadamente halto, y esey ta haci cu e trahado ta drenta den panico, nerviosismo, demotivacion, su produccion ta baha, y esaki ta locual cu nos a pidi e Gobernante atencion p’e, pa motibo cu nos kier cu un Post Aruba bay dilanti”, Brito a señala.

El a reitera cu nan tin dos pa tres aña caba den e lucha aki, y e ora ey naturalmente, e funcionamento lo ta minimo, no t’asina optimal cu ta hiba e compania padilanti.

El a subraya cu aworaki tin e caso den Corte di e 105 florin, y esey ta un posibilidad cu alomenos por suaviza un tiki e problema, pero e ta un opcion.

“Kico e trahadonan ta bay dicidi aworaki despues di expresionnan di e Gobernante (dialuna), y su posicion tuma, nos no sa ainda pero nos ta spera si cu na caminda tur dos partido ta reflexiona riba e situacion aki, pa nos ta bek na mesa y yega na un solucion. Na final nos no por lubida e hecho y riba locual nos a pidi atencion tambe di e Minister, corda si cu ora su mester a entrega e 12.6%, sin puntra a core hinca man den e cartera di e trahado!” Magaly Brito, Secretario General di SEPPA, a remarca.