POR lo establece un marine park

admin

ORANJESTAD(AA)—-  Michella Steenvoorde – Laclé candidato riba lista di POR ta indica cu POR lo establece un Marine Park y ancra den ley areanan protehi teniendo na cuenta un balansa entre proteccion di naturalesa y medio ambiente marino como tambe actividad economico.

Por ehempel lo stimula programanan di planta e coralnan di nobo, kweek e coralnan den colaboracion cu diving schools.

Pa tur hende cu conoce nos costanan y ta gusta snorkel e no ta un nobedad cu nos coralnan a bai sumamente atras. Na unda antes tawata tin coralnan di colornan bibo, awor ta parce un desierto bou di awa. Aruba mescos cu hopi otro paisnan den region a experiencia e fenomeno di “bleaching” cu ta pone cu e coralnan ta perde color y gradualmente ta keda bai atras te ora nan muri.

Bleaching ta wordo causa door di diferente factor, pero esun mas devastante ta e cambio den temperatura di e lama a causa di omicionan di carbono. The Great Barrier Reef na Australia tambe a conoce bleaching di nan coralnan na aña 1998, 2002 pero esun di mas devastador tawata na aña 2016 y un di e areanan cu mas a wordo afecta tawata Lizard Island na Far North Queensland cu a perde 90% di su coralnan.

Recientemente e gobierno di Australie a publica un maneho sustenible a largo plaso pa proteha nan coral reef, y nan a priminti ayudo financiero pa haci estudionan pa causanan di bleaching. E plan 2050 ta identifica y subraya e nececidad pa haci e coral reef mas resilient pa futuro cambionan den clima y na mesun momento e plan ta boga pa reduci e carbon omission.

Pero no muchu leu di cas, na Florida keys tin un di e research centersnan di mas grandi pa loke ta trata programanan di planta e coralnan di nobo. Kweek e coralnan den un area protehi, un Marine Park. Nos por siña hopi di nos bisiñanan, cu por yuda nos set up un programa a largo plaso cu ta transende cualkier gobernashon. Un programa pa Aruba, y su futuro generacionan.

Nos tin cu siña proteha loke ta haci nos unico,no solamente paso coralnan ta bunita sino paso nan ta fuente di alimentacion pa nos piscanan. Cu un programa di planta y kweek coral nos POR envolve communidad, scientificonan, diving schools y te hasta nos turistanan pa yuda presreva un naturalesa cu ta bayendo perdi rapidamente.

Esaki ta un ehempel di tur loke nos tin pensa pa cu nos medio ambiente, nos herencia cultural pa nos futuro generacionan!

Next Post

E impacto di Venezuela ta wordo sinti den turismo di Aruba

ORANJESTAD  (AAN) —- Den turismo di nos isla, Merca su prestacion ta fuerte, claro hunto cu diferente otro mercado tambe y e combinacion di esaki ta refleha tambe den resultadonan comparti door di AHATA. E bahada for di Venezuela ta impacta e volumen di e bishitantenan ‘stay-over’ pero esey sigur […]