Politico, docente, y autor hopi respeta Digna Laclé-Herrera a fayece

The content originally appeared on: Diario

ORANJESTAD (AAN): Den fin di siman a bira conoci, cu e conocido Digna Laclé-Herrera a fayece cu edad di 96 aña di edad.

  Un persona cu semper tabata stima Papiamento, y cu tabata duna su opinion regularmente den DIARIO pa mustra su pensamento riba diferente desaroyo politico, asuntonan di idioma, y tin biaha djis algo di proverbionan.

   E tabata tambe activo den politica, y tabata e prome lider di fraccion di Partido AVP tambe ora cu Aruba a haya su Status Aparte na 1986.  Esey tabata e partido cu semper el a sostene, duna guia, y suministra conseho.  Pesey mes for di seno di AVP mes a lanta “Fundacion Instituto Formacion Politico Digna Laclé-Herrera” (FDLH) na aña 2006 pa asina duna guia na politiconan nobo y hoben, pa stimula participacion di ciudadanonan, y pa duna informacion na comunidad riba diferente cuestion di gobernacion.

   E tempo ey a escoge pa e nomber di Digna Laclé-Herrera, debi na e importancia cu Digna tabatin pa comunidad Arubano y tambe politica.  Durante su bida di trabao, el a keda labora cu pasion na beneficio di Enseñanza, duna informacion na comunidad, y mas.

   Digna Marina Laclé-Herrera a nace na Curaçao dia 1 di November 1925. Na edad di 5 luna su mayornan a regresa Aruba cu ne, caminda cu el a sigui scol te cu 8ste klas, pa despues bay sigui MULO na Curaçao.

   Ora cu el a gradua, Digna a regresa Aruba. Tabata den temporada di Guerra Mundial 2 y tabata tin un scarsedad grandi di maestro na Aruba.

   Cu su 16 aña di edad, a scoge Digna pa bay para dilanti di klas, pero como e no tabata tin e edad pa traha como maestro, el a haya e permiso special di Gobernador Wouters pa duna aporte den enseñansa. El a cuminsa traha dia 1 di september 1942 y a keda den enseñansa te dia prome di november 1985.

   Trahando den enseñansa, el a sigui diferente curso pa completa su formacion como educador. Su interes y amor pa nos idioma Papiamento e ta considera como un herencia di su mama kende tabata gusta conta su yiunan storia.

   Papiamento na scol tabata prohibi y esey Digna Laclé-Herrera tabata considera un inhusticia, pero el a sabi di tene su mes strictamente na laga Papiamento pafo di scol. E ta lamenta cu asina hopi oportunidad a bay perdi pa Digna Laclé-Herrera a hinca den su alumnonan e amor profundo pa nos idioma Papiamento cu e mes tabata sinti.

   Den añanan 70 el a cuminsa na publica algo di su prosa y poesia, pasobra algun amigo a pidie esey. E publicacionnan aki nunca a yega na bira un coleccion den forma di un buki. DML tabatin e deseo si pero tur cos a keda den lachi.

   Danki na corant y revistanan cu a publica su prosa y poesia DML a haya publicidad. Via un programa radial na Curaçao señor E. Pietersz Heyliger a haci e pueblo di Curaçao conoci cu prosa y poesia di Digna Laclé-Herrera.
   E programa “Echa palabra” un programa cultural a duna asina hopi publicidad rond di e persona di Digna pa loke ta trata su trabao riba tereno di literatura. Na Aruba tambe e revista “Matinette” cu ta un revista pa mucha a publica hopi storia original di Digna Laclé-Herrera y un version di Digna di e “sprookjesnan” mas conoci den literatura mundial.

   Señora Digna Lacle-Herrera a traha hopi aña como maestra di scol. Riba tereno social Digna a traha den diferente organizacion di hende muhe y derecho di mucha. Digna tabata activo tambe riba tereno politico y a sirbi su pais como parlamentario pa e partido AVP den e prome Parlamento di Pais Aruba.

    Digna ta un autor cu durante añanan a produci masha hopi obra riba tereno di literatura, tanto den forma di prosa como poesia, anto na Papiamento. El a skirbi diferente buki cu a bira hopi gusta den pueblo.

    Pa medio di su inspiracionnan, Digna semper a trata pa eleva nos idioma Papiamento y tabata fuerte tambe ora di referi na e falta di reconocimento di nos idioma. Pa su aporte grandi na Papiamento, Digna a ricibi na aña 1996 e premio “Cadushi di Cristal”.

    Na famia, amigonan, y miembronan di Partido AVP, DIARIO ta extende su mas profundo palabranan di condolencia.