Polis ta confirma cu Carlos Huerta ta un di e supuesto atracadornan

admin

Noticia di Diabierna mainta den DIARIO confirma

Polis ta confirma cu Carlos Huerta ta un di e supuesto atracadornan1
Polis ta confirma cu Carlos Huerta ta un di e supuesto atracadornan2

ORANJESTAD (AAN): Ya caba DIARIO a publica dos nomber den edicion di Diabierna mainta, cu un periodista Venezolana a divulga. E lo a haya e nomber di fuentenan Venezolano cu a ser consulta door di autoridadnan.

Manera ta conoci, Dialuna 26 di october 2015 un atraco arma a tuma lugar riba Excelsior Casino. En coneccion cu e atraco aki, Mando Policial a lanta un team special di investigacion.

Durante e investigacion a logra determina cu tres persona masculino di habla hispano ta e personanan cu a comete e atraco arma riba e Casino. A resulta cu e atracadornan a bay cu un suma considerabel di placa for di e lugar.

E investigacion preliminar a duna como resultado cu e atracadornan a haci uso di entre otro un vehiculo di e marca Hyundai i10 color shinishi cu e matricula

V-2565. E vehiculo en cuestion a worde laga atras den e vecindario di Rooi Santo.

Haciendo investigacion riba e vehiculo aki a resulta cu e vehiculo ta registra riba e persona: Carlos Jose Huerta Ibarra, naci na 21 september 1981, Venezuela.

No obstante dos nomber ta skeiro caba na Venezuela, oficialmente na Aruba… segun Polis… ainda e team di investigacion no por confirma cu exactitud e identidad di e otro dos atracadornan. Unico cu nan a confirma ta Carlos Huerta, y DIARIO a publica esey caba Diabierna mainta.

E otro nomber cu DIARIO a menciona ayera tabata Victor Manuel Valente Albornoz di 24 aña di edad.

Cuerpo Policial ta gradici e pueblo Arubano pa cu e cooperacion di e pueblo di Aruba pa cu tur e informacionnan cu a drenta den e ultimo dianan aki.

Cuerpo Policial kier notifica pueblo cu si acaso nan por tin cualkier informacion riba e suceso pa no actua riba riba nan mes y pase inmediatamente pa Cuerpo Policial. E personanan aki ta sumamente peligroso y no ta descarta cu nan por tin arma di candela riba nan.

Encarecidamente nos di Cuerpo Policial ta pidi Pueblo pa si por tin cualkier tip of informacion riba e sucedido aki pa tuma contacto cu e Tiplijn di polis na e number 111-41 of tambe riba e number 527-3243.

Next Post

Trudy Hassel lo cuminsa traha dialuna awor

bek den staff di Polis ORANJESTAD(AAN): Segun minister di Husticia, mr. Drs. Arthur Dowers, sra. Hassel ex comisario y ex directora di KIA, ta na disposicion di ministerio di husticia y a palabra cun’e cu e lo cuminsa den Cuerpo Policial den funcion di miembro di e staff di Korpschef. […]