Polis Maritimo a rescata boto local den problema 4 miya zuid di Aruba

The content originally appeared on: Diario

ORANJESTAD (AAN): Tempo riba Diasabra tabata bon, casi no tabatin nada di disturbio y nubia.

   Banda di 10:45 am, autoridadnan a cuminza haya yamada cu tin algo pasando riba lama pazuid di Aruba.

   E prome informe a drenta via Central di Polis, cu un boto local cu nomber Teresa a haya problema cu su inboard motor.

   Central di Polis a core pasa e detaye aki pa Polis Maritimo, y nan a sali rumbo pa lama grandi.  Na un distancia di como 4 miya zuid di Aruba, a bin topa cu e boto aki color blanco, ‘Teresa’ cu matricula A-2551, cu 2 persona abordo.  E boto tabata sin forza, y tabata djis drief bay pabao.

   Polisnan Maritimo a puntra esnan abordo si nan ta OK, of tin mester di yudanza medico.  Nan a confirma cu nan ta bon, cu ta djis e inboard engine tin problema.  E ora Polis Maritimo a tira un cabuya pa nan, y asina a touw esaki trece bek sano y salvo pa Aruba.

   Segun vocero policial Lito Lacle, sigur e ta un bon trabao cu a bay bon coordina pa Polis a duna un man den esaki.

   E ta corda pueblo, cu pa Cuerpo Policial por resolve mas caso cooperacion y informacion di pueblo di Aruba ta hopi importante pesey nos ta pidi si bo tin cualkier informacion yama e Tipline na 111-41, y si ta casonan di urgencia por yama Central di Polis na 100.