Polis cu control nacional den luna di december

The content originally appeared on: Diario

Prevencion:

ORANJESTAD (AAN): December ta un luna bunita carga cu hopi actividadnan pa dianan di fiesta pero tambe nos careteranan lo ta druk. Famianan preparando un bez mas pa fin di aña pero esaki tambe ta trece cu trafico por bira insigur.

            Pa e motibo aki mes pa preveni mas accidentenan serio of fatal, Cuerpo Policial Aruba lo tene mas control preventivo durante e ultimo luna di aña 2023. E enfoke ta pa cada ciudadano por yega sigur  y trankil nan cas pa asina por celebra Pasco y Aña Nobo cu famia y sernan keri.

            Altocomisario di Polis drs. Ramon Arnhem ta pone enfasis pa tur ciudadano comporta y mantene nan mes na ley y reglanan di trafico.

Tambe altocomisario ta haci un peticion na nos comunidad pa lo siguiente:


Baha velocidad den trafico,
Tene distancia den trafico,
Bisti bo faha di seguridad. Muchanan sinta patras y pa baby sinta den nan carseat,
Si bo ta bou influencia no stuur!

            Pensa riba otro su seguridad, bo famia y di bo mes tras di stuur! Hunto nos por haci nos trafico den e temporada druk aki mas sigur pa cada un automobilista pero tambe  pa tur persona cu ta haci uso den nos caminda publico!