Polis a para auto coriendo cu slang di gasolin ainda pega na vehiculo

The content originally appeared on: Diario

ORANJESTAD (AAN): Diaranzon banda di 12:25 am, net ora cu unidad di Polis ta na Sasaki Service Station ta yenando e tanki gasolin di nan unidad,

nan a mira con un Chevrolet Aveo color blanco, ta pasando banda di Polisnan y su tapadera di tanki ta habri, y e slang di e pomp keto bay ta colga na esaki.

    Polisnan a duna e chauffeur un señal pa e stop, y el a cumpli cu esey tambe.

    Nan a acerca e chauffeur, y nan a puntre si el a ripara cu el a start su vehiculo y a bandona e Gasoline station, siendo cu keto bay e slang ta poni na su vehiculo.

   E chauffeur di inicial T., a declara na Polis cu e no a ripara mes cu el a ocasiona loke expertonan ta yama ‘breakaway’ di e slang.  Pues e persona aki ta hopi distrai mes.

   Polis a bise cu e tin di bay cerca personal di Sasaki Service Station, pa asina regla e asunto di e daño di a ‘breakaway’ y kibra e slang aki.  Na otro paisnan, un breakaway ta costa entre 200 pa 250 Florin pa drecha bek.

   Polis a tuma tur detaye di e chauffeur, y despues e chauffeur a bay paden di Sasaki Service Station unda el a duna nan  tur detaye di e daño.

   Na final, Polisnan a pone Central di Polis na altura tambe.