Polis a logra di gara un ladron cu a caba di horta tas di un obrero

The content originally appeared on: Diario

ORANJESTAD (AAN): Tabata Diamars mainta pa 9:35 am, net ora cu unidad di Polis di San Nicolas ta patruyando den area di Colony,

e agentenan a wordo para na altura di e Cancha di Tennis na Sero Colorado, door di chauffeur di un Hyundai H100 pickup.  E chauffeur a puntra e agentenan, si acaso nan no por a mira un homber color scur cu ta canando cu un schoudertas preto/shinishi cune.

   El a splica cu e homber colro scur ey a caba di horta e schoudertas ey for di su vehiculo.  Agentenan a puntra e chauffeur na unda e incidente aki a socede, pa asina nan por tuma e keho aki.  E chauffeur a pidi Polisnan pa sigui su tras pa asina e mustra nan unda esaki a socede.

   Ora cu nan a yega na e Compleho nobo di Condominium na Sero Colorado, e agentenan a bolbe papia cu e chauffeur di inicial B.

   E chauffeur a bisa cu ora esaki a socede, e mes tabata riba e dak di e condominio ‘The Water Edge’ na Sero Colorado.  Di eyriba el a mira con un homber desconoci a yega for di banda pabao.  El a mira claramente con e homber aki ta bayendo pariba, y despues el a drenta den parkinglot di e condominio di The Water Edge.

   El a mira con e homber a para un rato banda di su Hyundai Pickup blanco.  Kico el a haci banda di e vehiculo, e no por a mira bon como cu e ta riba e dak.  Pero el a nota cu esey ta sospechoso, y pesey el a core baha pa bay controla su Pickup.

   Ora el a yega cerca, mesora el a ripara cu su schoudertas no tey mas riba e asiento.  Un colega di The Water Edge a pone e chauffeur na altura tambe, cu el a mira un homber colro scur cu a cana cu e schoudertas aki rumbo pa Rodgers Beach.

   E ciudadano B. a bisa Polis, cu su schoudertas ta di marca Louis Vuitton, color preto y shinishi.  Den su schoudertas e tin un cartera marca Adidas, incluyendo zorgpas di AZV, un debit card, un perfume di marca One Million, un deodorante, y como 15 Florin na placa larga.

   E persona a sigui bisa, cu e homber ta canando cu un carson largo color berde scur, y un shirt scur.  E persona tin un postura delega.

   Despues di a tuma e keho, Polisnan a bay controla den e vecindario.  Na alura di un adres na Sero Colorado, e agentenan a topa cu un homber sospechoso cu ta cuadra cu e descripcion duna pa e denunciante.  E homber sospechoso ta canando cu un rugtas.

   Ora Polis a yega cerca di dje, agentenan a mira cu e tin un herida habri na altura di su wenkbrauw robez.  Polis a reconoce e sospechoso como un homber di inicial B. tambe.  Agentenan a djis yega cerca dje, y a puntre si el a caba di horta na e compleho di condominium.  El a bisa Polisnan cu si, y a duna como motibo cu el a haci esey pasobra e ta buscando cuminda.

   A base di esaki, Polisnan a detene e homber a base di Articulo 2:288 di Codigo Penal di Aruba.

   Ora nan a listra e homber, a check e rugtas y den esaki a bin haya e schoudertas preto/shinishi di marca Louis Vuitton.  Den dje a haya e cartera di Adidas, e perfume, y un deodorante.  Tur esaki a wordo confisca pa investigacion.

   E sospechoso a wordo hiba Warda di Polis, unda Fiscal Auxiliar a duna ordo pa e keda encarcela pa mas investigacion.