Polis a detene 13 persona durante e anochi di Parada di Luz San Nicolas

The content originally appeared on: Diario

ORANJESTAD (AAN): E programa di Carnaval ta yegando su final.  Diaranson anochi tabatin Parada di Luz San Nicolas.

   Dilanti Joe Laveist Sportpark pa exactamente 7:58 pm, Polis conhuntamente cu SMAC a haci inicio di e parada.

   Vocero Policial Liliana Rasmijn, a confirma cu e anochi ey, Cuerpo Policial tabatin 193 personal cu ta consisti di polis uniforma, recherche, ME, AE, Flex Team, Mobile Commando, K9 Unit,Trafico, Unidad Motorisa,Planologie, personal administrativo y personal di CEA.

   E parada a tuma e ruta largo, y pa 12:33 am, e cabez a yega bek na Joe Laveist.  E resto di parada a keda drenta, y pa 2:20 am e parada a yega su final.

   Durante e parada y a lo largo di e ruta, Polis a eherce 13 detencion di cual tabata pa droga, bringamento riba caya, hendenan cu no tabata sigui ordo di polis, arma blanco, buracheria, insulta polis.

   Compara esaki cu aña 2023, e tempo ey pa Carnaval 69 tabatin 9 detencion.